Terrorøvinga «Gemini» handlar både om hav- og landinstallasjonar knytt til olje- og gassverksemd.
– Øving Gemini er ei fellesøving der spesialstyrkar frå forsvaret og politiet kjempar saman mot terror på norsk kontinentalsokkel, seier politimeisteren i Nordmøre og Romsdal, Arnstein Nilssen.
Har ansvaret
Politimeisteren har ansvaret for øvinga. Han seier til NRK at det er viktig å ta terrortrusselen på alvor.
– Vi må ta terrortrusselen på høgste alvor. Dette er ikkje ei skrivebordsøving. Her er mykje folk i aksjon. Det blir aktivitet både ute i havet, og på land, forklarar han.
Arnstein Nilssen skal leie øvinga, men veit ikkje heilt kva konkret det er som skal skje. Men folk flest vil merke at noko spesielt er på gang.
– Det vil bli meir aktivitet enn folk er vande med. Kor mykje folk vil merke er vanskeleg å seie, det kjem heilt an på kva som skjer, seier han.
Stor øving
Øvinga er omfattande, og varer til onsdag. Både forsvarssjefen, politidirektøren, forsvarsministeren og justisministeren kjem til Kristiansund i tilknyting til øvinga.
– Sentrale aktørar i dette er forsvarets spesialkommando. Beredskapstroppen frå Oslo, bombegruppe, og utrykkingseininga frå Nordmøre og Romsdal politidistrikt.
Og politimeisteren gler seg til det som skal skje.
– Eg har gledd meg lenge til dette. Vi har gjort store endringar her på huset, og er no klare til å sette i gang, seier han.
«Gemini» er ei årleg øving der forsvaret trenar saman med politiet. Det er i hovudsak dei fire sokkeldistrikta, Rogaland, Nordmøre og Romsdal, Troms og Helgeland som deler på ansvaret for desse øvingane. Og i år er det altså Nordmøre og Romsdal sin tur. Sist dei hadde ansvaret for øvinga var i 2009, og då kom også kongen på besøk.