Det var ikkje akkurat lommerusk mannen forsynte seg med i Ørsta tidlegare denne veka. Eigarane av ein nesten eitt tonn tung oransje stålplog ba folk vere vakne, og fekk respons umiddelbart.
– Når du stoppar opp for å stele ein snøplog som veg eitt tonn, då er du frekkare enn flatlusa, skreiv Anja Kristin Sætre i eit Facebook-innlegg fredag ettermiddag.
Funnen i Sykkylven
For etter at innlegget blei delt mange gongar fredag ettermiddag, begynte tipsa å strøyme inn. Sætre fekk fort melding om at traktoren som køyrde avgarde med plogen var blå, og av merket New Holland. Snart kom det tips om at plogen var på ferja mellom Festøya og Hundeidvika i Sykkylven, og natt til laurdag ringde han som hadde reist med plogen sjølv til eigarane.
– Han hadde vorte fortalt at det var ein plog som kommunen skulle skrape, og at han berre kunne ta den om han ville, skriv Sætre i ein sms til NRK laurdag ettermidag om kva mannen sa då han kontakta eigarane.
Takkar for hjelpa
Sætre takkar no alle dei som har hjelpt til med å spore opp plogen. No håper dei at han som tok han, leverer han tilbake, slik han har lovd.
– Eg syns det er trasig at ein ikkje kan setje frå seg private ting utan å knyte det fast. Det forundrar meg at folk kan finne på å hekte på noko slikt og så berre køyre vidare, seier Sætre.
Har varsla politiet
Fredag ettermiddag var politiet på plass i Hovdebygda i Ørsta for å mellom anna sjå på spora etter at plogen forsvann.
– Saka blir anmeldt, og vi etterforskar på vanleg måte, seier operasjonsleiar Tove Holst-Dyrnes ved Sunnmøre politidistrikt.
Ho sa fredag at dei ikkje har kapasitet til å følgje med på alle tips som kjem via ulike Facebook-sider, men at dei generelt brukar å få inn ein del tips direkte til politiet i slike saker.
No er saka truleg løyst.