Stadig fleire syng i kor

SIRENE består av under tjue damer, som kjem frå kommunane på Ytre søre Sunnmøre. Det vil seie Sande, Herøy, Hareid og Ulstein.

I sommar hadde koret eit spennande prosjekt der dei spelte inn plate og fekk laga til musikkvideo av to av songane. Med god hjelp frå Erlend Vikene, Andreas Sætre, Joar Ødegård (dronefoto) og Rein Alexander var videoane spelt inn i flott sunnmørsnatur.

Koret har stadig nye spennande prosjekt på gang, fortel dirigent og musikar Torgeir Langberg Hauge.

Denne ettermiddagen tek NRK med kormedlemmene opp i Drageskaret med utsikt over øyane i Sande. I eit vakkert oktoberver.

To av kormedlemmene, Laila Muren og Marlen Hauge Knotten fortel at dei har ein dirigent som gir dei stadig nye utfordringar. Det at det vert stilt krav til dei, set dei pris på. Dermed er dei skjerpa og får noko meir ut av korsongen enn berre det sosiale, som også er viktig.

Vekst i Møre og Romsdal

I følgje generalsekretær Åsmund Mæhle i Norges korforbund er det til saman rundt 100 000 personar her i landet som syng i kor, og det har vore ein jamn vekst i mange år.

Mæhle seier til NRK at det er dokumentert at korsong er positivt både på psykisk og fysisk helse. Korsong har også god effekt for utvikling av lokalsamfunn og for integrering, seier han.

I Møre og Romsdal har kororganisasjonane samla 4900 medlemmer fordelt på 157 kor og Sunnmøre er saman med Nord-Trøndelag det området der størst del av folket syng i kor.

For SIRENE ventar no korcup 5.november, deretter julekonsertar. På nyåret er det stadig nye prosjekt på gang, seier dirigent Hauge. Utan at han vil gå nærare inn på det akkurat no.