Det var Sunnmørsposten som laurdag ettermiddag fortalte at klubbdirektør Henrik Hoff no stadfestar at dei er i forhandlingar med John Arne Riise.
Sjølv er han undervegs frå Singapore til Oslo, men tvitrar sjølv om saka laurdag kveld etter at TV2-programleiar Arill Riise skriv at han håper snart å kunne ønskje Riise tilbake i AaFK:
Broren til John Arne, Bjørn Helge, stadfestar overfor NRK Møre og Romsdal at der er aktiv kontakt mellom partane.
– Eg veit dei er i dialog, men om han er på veg, veit eg ikkje. Det hadde uansett vore utruleg moro, seier yngstebroren.
John Arne Riise sjølv sa i juli til NRK at han var klar på at han kjem til å avslutte karrieren i heimbyen Ålesund. Og no kan det altså vere like rundt hjørnet.
– Må ta eit val
Bjørn Helge Riise (32) seier til NRK Møre og Romsdal at han har snakka med storebroren John Arne (35) om ein eventuell overgang til AaFK, og at han trur det no kan bli fart i sakene.
– Slik eg har forstått John Arne har han fått eit tilbod, og han må ta eit val. Det har mellom anna med Bettson og forbunda å gjere, seier yngste blad Riise.
Trur det vil bety mykje
Laurdag ettermiddag sit storebroren på eit fly på veg frå Singapore til Oslo, og er utilgjengeleg for kommentarar. Bjørn Helge Riise meiner det vil bety svært mykje for klubben å kapre storebroren.
– Eg trur han ville hatt mykje å seie både for publikumsinteressa og for laget, han er ein spelar med svært mykje erfaring. No gjenstår det berre å sjå om guten er i form og kan bidra , seier Riise junior.
Kan vere klar allereie over helga
Ifølgje Sunnmørsposten kan Riise vere Aalesunds-spelar allereie neste veke, og både Betsson og Riise skal vere villige til å avbryte Betsson-avtalen for at Riise skal kunne spele i norsk fotball.
Les også:
Så langt har avtalen med det utanlandske speleselskapet gjort at han ikkje kunne spele i norsk fotball, men no kan altså dette vere historie.
Går alt greit, kan Riise dermed vere klar for seriestarten mot Stabæk fredag ettermiddag.
Trur Riise-brørne vil lokke fleire på kamp
Leiaren i supporterklubben Stormen seier til NRK Møre og Romsdal at nyheita kom overraskande på han, men at han meiner det er svært positivt.
– Det er veldig positivt om brørne Riise kan spele saman, og John Arne er jo ein kapasitet, seier leiar Bjørn M. Mikkelsen.
Han trur oppslutninga rundt klubben vil auke dersom også storebror Riise no blir å finne i AaFK sin spelarstall.
– Ja, eg trur at det vil bidra til fleire publikummarar, då kjem det nokre profilar som folk ønskjer å sjå, seier han.
Trur på meir enn 50 prosent sjanse
Det har i lang tid vore spekulert i om at John Arne Riise ville kome tilbake til AaFK, der han starta den fantastiske karrieren sin. No trur Mikkelsen sjansen er ganske stor for at det er eit faktum.
– Når Henrik Hoff seier det er femti prosent sjanse for å lukkast med ein kontrakt, trur vi det i realiteten er endå større sjanse. Eg trur sansynlegheita er ganske stor for at Riise kjem no, seier han.