Laurdag og søndag er det duka for ein rekke Europaliga-kampar på Moldebadet. Totalt ni lag frå heile Europa har tatt turen til Molde for å delta i den andre runden av Europan Underwater Rugby League.
– Det er utruleg artig å få alle dei vi møter ute i Europa hit til Molde. Det er kjekt å kunne vise fram byen vår, og spelarane skryter både av den, utsikta og anlegget, seier Iver Røberg Bjørnerem, spelar i Molde undervassrugbyklubb og landslagstrenar.
- Les også:
Viktig for rekrutteringa
Bjørnerem fortel at slike arrangement er med på å sette Molde på kartet.
– Det å arrangere eit slik meisterskap er nøkkelen til å kunne utvikle oss vidare. Det viktig for oss som klubb å arrangere eit slik meisterskap på heimebane, seier han.
Det er også svært viktig for vidare rekruttering, meiner Molde-spelaren.
– Eg trur det kan vere ein augeopnar. No har vi sjansen til å vise at internasjonale kampar blir spelt her i Molde, og det er med på å auke interessa for sporten, seier Bjørnerem.
– Vi har fått fleire yngre spelarar dei siste åra, og eg trur det er fordi sporten har blitt meir kjent blant folk flest, held han fram.
- Les også:
Blir godt med støtte
Molde undervassrugbyklubb, som også var nominert til årets lag under Idrettsgallaen, har gjort det svært bra så langt i år. Laget vann alle sine tre kampar i den førre runden som blei spilt i Finland, og er saman med russiske UWRC Betta det einaste laget med full pott så langt.
Molde spelar to kampar denne helga. Laurdag klokka 18.00 møter dei det andre norske laget i turneringen, Akkaren, og søndag måler dei krefter med SDK Malmö Triton frå Sverige.
– Vi går for seier i begge kampane, og tar sikte på å passere det russiske laget på tabellen i løpet av helga, seier Bjørnerem.
Han ser spesielt fram til å ha heimepublikummet i ryggen under kampen.
– Det er sjeldan vi har så mykje publikum så det blir kjekt å ha vener, familie og andre kjente her for å heie på oss, seier Bjørnerem.
Molde er regjerande meister i Europa League, og har vunne alle av turneringane dei tre siste årene.
- Les også: