Spektakulær ekstremsportfilm med Sunnmørs-scener klar for verda

Det går både fort og høgt. Og du får eit ekstra godt sug i magen berre ved å sjå dei heftige videoklippa frå sunnmørsfjella. Deltakarane i filmen står på ski ned dei brattaste fjellhenga du kan tenkje deg, dei padlar ned loddrette fossar, det gjeng føre seg til lands og til vanns og i lufta med.

Det er klart for sesong 2 i serien «Don't crack under pressure». Fjella, snøen og fjordane er klar for den store, vide verda.

– No skal filmen visast i ti byar på to veker. Det blir ein europaturne der vi startar i Paris på fredag, seier skikøyrar Karsten Gefle til NRK.

• Les også: Utfordrar naturelementa i spektakulær film

Filmen startar med 20 minutt skikøyring på Sunnmøre. I vår var det franske filmselskapet og ekstremsportutøvarar og gjorde opptak i Hjørundfjorden. Der fekk dei verkeleg oppleve kor ustabile vindane kan vere.

– Å køyre kite i Hjørundfjorden og føle korleis vinden tek det slik at du blir hengande i lufta i over 21,5 sekund, då sette eg nok ny verdsrekord for denne forma for kite-boarding. Det var temmeleg fantastisk, seier kite-boardar Jesse Richman.

I tillegg til å vere med på skiscener i filmar som dette er Karsten Gefle med på å utvikle Sunnmøre som skidestinasjon.

– Vi har berre sett starten av det som kjem til å skje med aktivitetsbasert reiseliv. Eg trur vi har mykje gøy i vente, seier Gefle.

• Les: Slike filmar har stor effekt

Gefle har i løpet av dei siste åra vore med i åtte ekstremsportfilmar. Han trur det kjem til å bli laga fleire filmar frå dette området.

– Rykta går om at det kjem til å skje. Så får vi sjå, smiler han lurt.