Sidan 2013 har over 15 000 jobbar i oljebransjen forsvunne. Oljeproduksjonen på norsk sokkel er redusert i tillegg til at kostnadane har auka kraftig. I Kristiansund har oljenæringa spelt ei viktig rolle, men regionen har hamna i ein alvorleg situasjon etter olja sin nedtur. No skuldar politikarar og næringsfolk frå Nordmøre sentrale personar for å vere for negative til oljenæringa, og gir klar beskjed om at negativt snakk er det siste dei treng no.
– Eg vert provosert. Olje skal vi leve av i mange år framover og han som skal stoppe krana i Nordsjøen er ennå ikkje fødd, seier ordføraren i Kristiansund, Kjell Neergaard.
Spår olje-opptur om to-tre år
Ordføraren oppmodar unge om å starte på ei utdanning innan næringa og han spår ein opptur for olja i løpet av dei neste tre åra.
– Vi treng framleis folk som utdannar seg innan oljesektoren. Når sentrale personar snakkar næringa ned, så spreier dette seg til foreldre, skulerådgjevarar og barn som til slutt vil velje andre utdanningar, meiner Neergaard.
Må behalde kompetansen
Sjølv om dei fleste erkjenner at ei omstilling må til, er Nordmøre framleis så avhengige av olje og gass at dei misliker sterkt at sentrale politikarar ikkje gir denne næringa ei framtid.
– Vi må skaffe oss fleire bein å stå på, men også sørgje for at vi beheld kompetansen og rekrutterer flinke ungdom til bransjen. Noreg skal leve lenge av olje og gass og mange vil halde fram med å jobbe innan denne næringa, seier næringsminister, Monica Mæland.
Ynskjer nye innspel
Tysdag besøkte to statsråd Kristiansund for å snakke med dei lokale politikarane og næringslivet om situasjonen regionen er i.
– Det er nett på grunn av situasjonen som er her i fylket at vi ynskjer å kome hit og besøke næringslivet, snakke med NAV og med dei som opplev nedgangen på kroppen for å få konkrete innspel, seier arbeids- og sosialminister, Anniken Hauglie.