– Fint søstermøte på landslaget

Når Noreg møter Wales på stadion i Ålesund fredag er det stor sjanse for at begge systrene Hegerberg frå Sunndal er på laget. Både Andrine og Ada Stolsmo Hegerberg er med på samlinga i Ålesund, og dei stortrivest i lag.

Andrine og Ada Stolsmo Hegerberg

Andrine Stolsmo Hegergerg (22) og Ada Stolsmo Hegerberg (20) er klar til innsats i kampen mot Wales fredag.

Foto: Frode Berg / NRK

Andrine er storesøster og Ada er veslesøster. Og begge ber dei namnet Stolsmo Hegerberg. Dei to kjenner kvarandre godt. Det er knappe to år mellom dei, så dei har vakse opp i lag, dei har trent i lag og tidlegare spelte dei på same klubblaget, både i Sunndal, Kolbotn og Potsdam.

– Trivest godt i lag

Dei meiner at dette gjev dei ein ekstra god kjemi på bana.

– Det er kjempeartig at eg og Ada får spele på same lag. Det er ei stund sidan vi spelte på same klubblag, og då er det veldig fint å få vere saman på landslaget. Og vi snakkar ganske mykje fotball saman, og det gir også positiv effekt på spelet på bana, seier Andrine Stolsmo Hegerberg.

Så det er ein fordel å ha dykk to systrene saman på landslaget?

– He, he, det får du seie til trenaren i så fall. Men vi trivest godt saman også på bana, seier Andrine.

Når Noreg møter Wales på stadion i Ålesund fredag er det stor sjanse for at begge systrene Hegerberg frå Sunndal er på laget. Både Andrine og Ada Stolsmo Hegerberg er med på samlinga i Ålesund, og dei stortrivest i lag.

Reiste utanlands

Men for eit par år sidan drog dei to jentene i kvar si retning. Andrine reiste til Sverige og spel for Kopparbergs/Göteborg. Litt seinare drog også Ada frå Potsdam til Frankrike. Der spelar ho for topplaget Olympique Lyonnais.

Dermed har landslaget blitt ein fin måte for søstrene å møtast på. Når det er landslagssamling i Ålesund kome på same rom.

– Det er ikkje så ofte vi ser kvarandre. Så no brukar vi tida godt saman, seier Ada Stolsmo Hegerberg.

Held kontakten på landslaget

Også Andrine legg vekt på at landslagssamlingane er eit godt høve til å halde kontakten med Ada.

Det er ei stund sidan vi har sett kvarandre no. Det skjer stort sett på landslagssamlingar, i jula og i feriar. Vi trivest i lag og det blir ganske god stemning når vi møtes.

Ada fortel at dei to systrene har funne mykje motivasjon i kvarandre. Dei har hjelpt kvarandre framover og dei har vore treningskameratar.

– Å vekse opp og trene og spele saman med systera mi har vore ein av dei viktigaste faktorane for å kome opp på det nivået vi er no, seier Ada.

Utvikla seg ulikt

Andrine hugsar imidlertid at dei to systrene hadde litt forskjellig utvikling. Sjølv var ho ganske god frå ho var lita, medan Ada kom sterkt etter kvart.

– Men vi vaks opp i ein fotballfamilie med mamma og pappa. Så det har handla mykje om fotball og det var naturleg for oss å velje denne aktiviteten.

Verken Andrine eller Ada vil kalle Ålesund for heimebane. Dei er nordmøringar og er frå Sunndal. Men begge set pris på at kampen mot Wales skal spelast i Ålesund.

– Naturen her er jo Noreg på sitt beste, seier Ada. Og det kjennest godt å vere så nær Nordmøre. Også Andrine legg til at det er godt å vere i Møre og Romsdal desse dagane, og ho reknar også med at det kjem folk frå Sunndal for å sjå kampen på fredag.

Vil slå Wales

Fredag er det altså EM-kvalifiseringskamp mot Wales. Og begge systrene har stor tru på det norske landslaget.

– Dette er ein kamp vi skal vinne, det er det ikkje tvil om, seier dei. Eigentleg tenkjer vi ikkje så mykje på resultatet, men meir på dei arbeidsoppgåvene vi skal utføre. Så får vi håpe at det er godt nok til å slå Wales.