Internasjonale popstjerner, nasjonale favorittar og nye stjerneskot.
Kva har dei til felles, anna enn at dei har gjort karrierar som vokalistar og kjem frå Sunnmøre?
Det er Solveig Håvik.
Den no pensjonerte songpedagogen har ei merittliste av dei sjeldne.
Lovord
Sigrid, for tida på turné, skriv i ein e-post at Håvik, saman med pianolæraren Johan Sewerin, er ein av hovudgrunnane til at ho driv med musikk i dag.
– Eg lærte masse nyttig vokalteknikk av Solveig, men det viktigaste var nok at eg blei oppfordra til å utvikle stemma mi og vere nysgjerrig på andre musikksjangrar.
Sigrid fortel at songpedagog Solveig Håvik og pianolærar Johan Sewerin har betydd svært mykje for henne.
Foto: Markus Indrebø Langlo / NRKDet gjorde sterkt inntrykk på Sigrid første gongen Håvik spelte Eva Cassidy for henne.
– Eg er evig takksam for all den ikoniske musikken eg fekk høyre, skriv ho.
Ho er ikkje åleine om lovorda.
Norsk-greske Amanda Tenfjord representerte Hellas i finalen av Eurovision i år.
– Eg hadde ikkje vore der eg er i dag utan henne, seier Tenfjord om sin tidlegare songpedagog.
Amanda Tenfjord kom på ein åttandeplass i Eurovisionfinalen i Torino i mai i år.
Foto: EBU/Corrine Cumming
Smittande energi
Natalie Sandtorv jobbar for tida med eit bestillingsverk til årets Moldejazz.
Ho byrja med Håvik som fjortenåring og seier det har vore fundamentalt for henne.
– Ho gav meg trua på at eg hadde noko i musikken å gjere. Ho har betydd mykje for meg.
Ein annan tidlegare elev er Stine Hole Ulla. Ho var den første kvinna til å vinne TV-programmet Norske Talenter, berre 17 år gamal.
Ulla trur det er veremåten til Håvik som er nøkkelen til suksessen som pedagog.
– Energien hennar smitta over på meg og sikkert alle dei andre elevane ho har hatt. At ho var så oppriktig interessert i det ho gjorde, fekk meg til å ville øve mykje.
Håvik har ikkje lagt heilt opp som songpedagog endå. Før finalen i Eurovision hadde ho Amanda Tenfjord på besøk. At fleire av elevane hennar har gjort karriere som songarar, synest ho er utruleg kjekt.
Foto: Remi Sagen / NRKFokuserer på det positive
– Eg blir heilt rørt, seier Håvik.
Ho synest det er rart at artistane stadig vekk nemner henne i intervju.
For sjølv meiner ho at det er ho som har vore heldig som har fått undervise så mange talent opp gjennom åra.
– Sjølv om talentet er der, så er det ikkje alle som klarer å leve av songen. Kva er oppskrifta di?
– Det finst ikkje noko oppskrift, men ein må vite at dette ikkje kjem av seg sjølv. Desse jentene har jobba knallhardt og har verkeleg hatt eit ønske om å leve av musikken.
Å ha fokus på elevane sine styrker har vore viktig for Håvik i karrieren.
– Når du finn noko bra hos ein elev, er det betre å fokusere på det, enn på det dei ikkje meistrar like godt.
Då vil det kome endå meir bra etter kvart, har ho erfart.
Det å vere ærleg med elevane, har vore ein grunnpilar for Håvik i karrieren som songpedagog.
Foto: Remi Sagen / NRKMen nokre konkrete tips og triks for å trene opp store, stødige stemmer, er det likevel.
Varm opp!
Varm opp stemma med gode øvingar kvar dag. Slik unngår du å få songarknutar; skadar på stemmebandet.
– Ei god oppvarmingsøving er ei der du aktiverer både hovudklang og brystklang.
Finn di eiga stemme
Å «sleppe taket» og finne sine eigne stemmer, er noko Håvik og elevane har jobba mykje med.
– I staden for å tilpasse deg eit rom, må du tilpasse deg din eigen kropp. Du må jobbe med å senke strupehovudet for å unngå å få ei pressa stemme.
Eit tips for å få strupehovudet ned, er å gjespe. Då løfter du den mjuke ganen og senkar tungerota, fortel ho.
Forstå kva sjanger du syng
Du må kjenne til ulike sjangrar og vere bevisst kva sjanger du syng. Det er heilt essensielt, ifølgje eksperten.
– Sjå for deg at nokon syng den klassiske songen «Våren» av Edvard Grieg, med hås pop-stemme. Det vil bli veldig rart, ler Håvik.
Få fram bodskapen
Du må vere tydeleg og artikulert når du syng.
– Eg trur at dei som er flinke til å få fram bodskapen i det dei syng, også syng litt reinare.
