Basel var inga draumetrekning for Molde. I fjor slo den sveitsiske meisteren ut mellom anna Manchester United frå Champions League.
Likevel; utan eit unødvendig raudt kort på Aker Stadion førre onsdag, kunne Molde fort hatt eit glimrande utgangspunkt før returoppgjeret i Sveits.
- LES OGSÅ:
- LES OGSÅ:
For då Molde-spiss Davy Claude Angan fekk raudt kort etter berre 25 minutt, såg det mørkt ut for Molde.
Basel klarte derimot ikkje å utnytte fordelen til fulle, og ved full tid stod det 0–1. Før returoppgjeret i Sveits onsdag er Solskjær veldig tydeleg.
– Der er moglegheiter, men Basel er sjølvsagt favoritt når dei slo oss her i Molde.
Fekk «boost» etter Sogndal-siger
Vi møtte Ole Gunnar Solskjær på siste Molde-trening før avreise. Etter tre Tippeliga-poeng, etter 2–1 mot Sogndal, i helga er stemninga i gruppa på topp.
– Det var viktig med tre poeng mot Sogndal etter tapet mot Basel. Vi spelte godt, men tapte mot Basel, sa Solskjær måndag.
No håper han på ein fantastisk fotballkamp i Sveits.
– Vi gler oss til å spele på ein stor stadion, mot eit godt lag.
– Det er slik fotball skal vere, slo Molde-trenaren fast.
– Vi må score først
Dette er tredje kvalifiseringsrunde til Champions League. Molde gjekk rett inn i andre kvalifiseringsrunde, der dei slo latviske Ventspils over to kampar.
Sjølv med siger over Basel er vegen lang. No er derimot tankane på å overraske i Sveits.
– Vi må ut og score først. Då fører vi plutseleg kampen, og dei må score to mål for kvart påfølgjande mål vi scorar.
– Vi skal enkelt og greitt gå offensivt ut, avslutta Solskjær.
Kampen mot Basel går onsdag og startar klokka 20.00.