– Vi har lyst til å avslutte den norske sesongen med cupfinale. Sist gong Molde var i cupfinalen tapte vi for AaFK.
Molde-trenar Ole Gunnar Solskjær var ikkje sjølv med på tapet, men ser i spelargruppa at tapet sit godt igjen.
- LES OGSÅ:
– Slike minne sit kanskje enda betre igjen enn når ein vinn. Det er mykje revansjelyst blant spelarane.
– De vil rette opp litt?
– I fjor gjekk vi til kvartfinalen, og i år blei vi einige om at vi ville til cupfinale. Det er eit naturleg mål for oss.
– No har vi ein god sjanse til å nå finalen, men før må vi slå Tromsø, seier Solskjær til NRK.no.
Avgjorde gullkampen i Tromsø
Av alle dei moglege utfalla cuptrekninga kunne få, var nok Tromsø borte det verste. Molde kunne fått Hødd på heimebane, med Ulstein-laget skal møte Brann på Høddvoll.
Likevel, Solskjær har gode minne frå Tromsø.
– Det blir ein spennande kamp, men vi har gode minne frå Tromsø i fjor, då vi meir eller mindre sikra seriegullet.
Samtidig snur Solskjær på krona, og meiner Molde var det verste Tromsø kunne få.
– Vi var nok laget Tromsø minst av alt ville trekke. Vi reiser til Tromsø for å vinne, seier Molde-trenaren.
– Synd det blei bortekamp
Heller ikkje Magne Hoseth er livredd over Tromsø som semifinalemotstandar. At det ikkje blei heimekamp er ein større nedtur.
– Hadde vi fått heimekamp hadde vi nok drege 8-9-, kanskje 10.000. Så det er litt synd. Så mange kjem det ikkje i Tromsø, trur Hoseth.
Om kampen trur han det blir jamnt, men at Molde vil drage det lengste strået.
– Om vi skal vinne cupen så må vi uansett slå dei beste. Dermed var det litt likegyldig kven vi trakk.
– Fotballmessig er Tromsø eit lag vi er fullt på høgde med, og helst skal slå, avsluttar Hoseth.
Cupkampane blir spelt 26. og 27. september.