Snøbyer truar seriestarten

Storstilt dugnad i Molde

Snøen skaper betydelege utfordringar før seriestarten søndag. I verste fall kan kampane bli avlyste. Timane før kampstart klokka 20 går med til å rydde baner og sjekke vermeldingane kontinuerleg.

• Dugnad for å redde kamp

- Vi har kalla inn til stortstilt dugnad for å rydde unna snøen, seier direktør i Molde FK, Tarje Nordstrand Jacobsen. Han meiner det kom rundt 15 centimeter laurdag og 20 centimeter i løpet av natt til søndag.

• Syns du eliteseriestarten bør utsetjast på grunn av snøveret? Ver med i diskusjonen nedst i artikkelen!

RBK-supporterne har inntatt Molde

- Betydeleg utfordring

Også søndag formiddag snødde det kraftig i Molde.

- Dette blir ei betydeleg utfordring. Vi satsar på at undervarmen skal smelte vekk snøen på sjølve bana, og eg kan no skimte grønt gras under det kvite. Tribunene prøvar vi å rydde med snøskuffer og spadar, medan traktorar tek området utanfor stadionet, seier Nordstrand Jacobsen.

Sjekkar veret kvart 5. minutt

Situasjonen er ikkje mykje betre i Ålesund. Der skal Aafk etter planen møte Lillestrøm klokka 18, men søndag formiddag måkar ein stor traktor bana for å få ho snøfri.

- Vi sjekkar vermeldinga kvart femte minutt. Men vi er sikre på at det blir kamp, så lenge det ikkje kjem eit voldsomt snøfall akkurat når kampen skal begynne. Det er det verste som kan skje, seier dagleg leiar i Aafk, Henrik Hoff. Lillestrøm-trenar Henning Berg brukar søndagsformiddagen til å jogge frå Ålesund sentrum til Fjellstua. Han seier snøveret ikkje skal stoppe dei.

- Dersom bana er klar, så er vi klare, vi, det er ingen problem. Når seriestarten er så tidleg, så kan sånt skje, seier Berg.

Snøbyer søndag

Men meldingane frå Vervarslinga for Vestlandet er alt anna enn optimistiske med tanke på snø. Vakthavande meteorolog Berit Hagen seier det vil snø jamnt utover ettermiddagen.

- Det vil sikkert bli vanskeleg å spele og få fart på kula, for det er meldt snøbyer heile søndag og måndag, seier Hagen.