– Det var dråpen, seier Mette Grøndahl om sjukehussaka.
Ho er ein av dei som hadde tatt turen til Smølahallen tysdag kveld, og som tok til orde for at Smøla skal bli ein del av Trøndelag.
– Tilhøyrigheita vår er meir trøndersk, næringslivet vårt er meir trønders og eg kjenner meg meir som trønder er som møring, seier ho.
Også støtte til å halde fram på eiga hand
Og ho var ikkje aleine. Viljen til å sjå nordover hadde brei støtte under folkemøtet, anten folk vil til Trøndelag med Kristiansund som partnar eller gjennom ei samanslåing med andre mindre kystkommunar på Nordmøre og i Trøndelag.
Ordførar Roger Osen frå Arbeiderpartiet meiner likevel møtet i går også viser eit sterkt ønskje om at Smøla får halde fram som ein eigen kommune.
– Av dei som har møtt opp her meiner eg det tydelegaste signalet er at Smøla skal halde fram som eigen kommune.
– Utfordringane våre er at vi skal greie å tydleggjere kva for utfordringar vi har for at vi skal kunne overleve som ein kommune i framtida, seier han.
Samle Nordmøre?
Også næringslivsleiarane sitt innspel om å samle Nordmøre til ein kommune, for så å sjå mot Trøndelag, blei debattert. Ordførar i Kristiansund, Per Kristian Øyen meiner debatten om kommunesamanslåing og regiontilhøyrigheit må kunne gå parallellt.
– Eg høyrer mange meiner det er eit sidespor å snakke om regiontilknytting no, men eg trur vi toler begge deler. Og det dummeste vi gjer er å stoppe debattar som skaper engasjement, meiner han.
– Trøndelag freistar
Og blant tilhøyrarane var det mange som var opptatt av å sjå over fylkesgrensa.
– Det er samme folket og det samme vi lever av, fiskeri og oppdrett, seier Svein Roksvåg.
Også han er blant dei som ønskjer seg nordover mot trøndelagsfylka. Han har lite tru på at Smøla skal bli ståande aleine i framtida.
– Nei, det trur eg ikkje noko på, vi er for få.