Dei fleste smitta kjem frå Atlanten vidaregåande skole. 12 i Kristiansund har testa positivt, tillegg har tre personar i andre kommunar fått korona via same smittekjelde.
Hittil er 250 sett i karantene i Kristiansund. Kommunen ser på situasjonen som alvorleg og det kan bli endå fleire smitta.
– Utbrotet vi har no er i ungdomsmiljøet. Vi veit at ungdom har lyst å møtast i jula, men det er svært viktig å huske smittevernreglane, seier ordførar Kjell Neergaard (Ap).
– Ikkje test unødig
Kommunen opplever at mange er bekymra og kontaktar koronatelefonen. Testkapasiteten er no sterkt pressa og kommunen ber om at folk ikkje testar seg berre for sikkerheits skuld, utan å vere nærkontaktar eller ha symptom.
– Vi ynskjer ikkje at folk i redsel skal sette seg opp på unødvendige testar. Det svekker beredskapen, seier Sandvik.
Mange stader i landet har studentar som kjem heim til jul blitt oppmoda om å teste seg. I Kristiansund ber no kommunen dei la vere å ta test og heller halde seg i ro heime, dersom dei ikkje har symptom.
Kommunen har heva beredskapsnivået og anbefaler at alle over 12 år brukar munnbind under kollektivtransport og i offentlege rom der det ikkje er mogleg å halde ein meters avstand.
– I løpet av dei neste par dagane ser vi det totale omfanget av utbrotet, seier kommuneoverlege Askill Sandvik.
Fekk korona
Lana Elizabeth Ingrid Hansen (17) tok koronatest på måndag og blei ringt opp dagen etter med den nedslåande beskjeden. Ho testa positivt. Ho går andreåret på musikklinja Atlanten og var budd på at det kunne skje.
– Det var ikkje overraskande, men likevel surrealistisk, seier Hansen.
No blir julefeiringa annleis enn planlagt. Farmor som skulle feire saman med familien kan ikkje kome. Forma er bra og no held ho seg på rommet sitt. Her held ho kontakt med vennane via laptopen.
– Det blir annleis, men eg er fornøgd med at eg held andre trygg, seier 17-åringen.
Kommunen ventar svar på fleire testar i løpet av kvelden.