Småfly trefte bakken

Hopp til innhold

Politiet stengde Ørsta/Volda lufthamn Hovden som følgje av ulykka. I 23.00-tida tysdag kveld melde politiet at flyplassen truleg ikkje vil opne igjen før ut på natta.

– Vi har ein kriminalteknikkar som er på veg til staden. Flyplassen blir ikkje opna igjen før han er ferdig med arbeidet, seier Per Åge Ferstad, operasjonsleiar i politiet.

Det var like før klokka 20.00 tysdag kveld at politiet fekk inn melding om eit småfly som hadde gått i bakken ved Ørsta/Volda lufthamn Hovden på Sunnmøre. Alle naudetatane rykte raskt ut til staden.

– Flyet trefte bakken hardt i det dei skulle til å ta av, sa operasjonsleiar i politiet, Tor-Andre Gram Franck til NRK like etter ulykka.

To til sjukehus

Flyet, som skal ha vore eit mikrofly, låg ved utkanten av rullebana etter uhellet. Dei to som sat i flyet var ifølgje politiet bevisst etter ulykka.

– Ein person blir frakta med luftambulanse til sjukehuset i Ålesund, og den andre blir frakta til sjukehuset i Volda for sjekk, sa Gram Franck til NRK i 20.00-tida tysdag.

Både piloten og passasjeren skal ha vore født på 1980-talet. Det er så langt uklart kor alvorleg skadd dei to er, men ifølgje politiet er det truleg ikkje snakk om alvorlege skader. Piloten blei sendt til sjukehuset i Volda, medan passasjeren blei frakta til Ålesund.

Saka blir etterforska

Det er så langt ukjent kva som var årsaka til uhellet, men ifølgje politiet skal det vere snakk om ei øvingsflyging. Saka blir no etterforska.

– Vi gjennomfører vitneavhøyr på staden, og så må vi nesten prate med dei to involverte for å få vite kva det er som faktisk har skjedd, seier Gram Franck.

Politiet sine krimteknikarar er på veg til staden for å gjere undersøkingar av flyet. Havarikommisjonen og Norges Luftsportforbund er også varsla om ulykka.