I løpet av 13 månader har Gudrun Høie (36) frå bryteklubben KAK fått fire åtvaringar fordi ho har brote reglane om heile tida å seie frå kvar ho er.
Slutt på karrieren?
No har påtalenemnda i Antidoping Norge meldt henne til påtalenemnda i Norges Idrettsforbund for brot på regelverket, og har innstilt på at ho blir utestengd frå konkurransar og organisert trening i eitt år. Meldeplikta for idrettsutøvarar er innført for at dei skal kunne dopingkontrollerast når som helst.
Gudrun Høie har vore verdsmeister fire gonger, og har som sitt klare mål å bli med i OL i Kina neste år. - Det skulle vore mitt siste år i toppidretten. Blir eg utestengd, eg det slutt på karrieren min, seier ho til NRK Møre og Romsdal.
- Tungvint system
- Eg er blitt testa fleire gonger for året, så det er ikkje det at eg aldri melder frå kvar eg er, seier Gudrun Høie. - Men av og til vil det gleppe i eit travelt liv. For ein amatøridrettsutøvar som må ordne alt åleine, er det eit veldig tungvint system, så dette kjennest urettferdig.
- Men du har skrive under på at du godtar desse reglane?
- Ja, men eg hadde ikkje noko val, og då skjønte eg vel heller ikkje kva det innebar, seier Gudrun Høie, som no er på treningsleir i Sverige saman med brytelandslaget.