NRK Meny

Skuldingar mot Svorka-direktør

I ein intern revisjonsrapport blir den avgåtte toppsjefen i energiselskapet Svorka skulda for fleire lovbrot. Styret har konkludert med at han ikkje har gjort medvitne lovbrot, og vil ikkje melde han til politiet.

Kilde: Adresseavisen/NRK

Artikkelen er flere år gammel.

Både administrerande direktør Ove Skrøvseth og styreleiar Rolf Maridal gjekk i haust av, og det har vore mange spekulasjonar om kvifor.

Pussa opp hytta

Laurdag skreiv Adresseavisen i ein større artikkel at hytta til Skrøvseth på Tustna blei pussa opp av eit firma som dåverande styreleiar Maridal og son hans eig, og rekninga blei send til Svorka Energi. Då Skrøvseth blei konfrontert med dette, skal han ha hevda at utgiftene gjaldt oppussing av ein montørstasjon i Halsa. Rolf Maridal seier at han ikkje visste om oppussinga av hytta før Skrøvseth sjølv tok fram fakturaen.

Revisjonsrapporten påpeikar også at vegen til hytta er blitt grusa på Svorkas rekning.

Avtale

Adresseavisen skriv vidare at det blei laga ein avtale om at Svorka skulle betale for arbeidet på hytta mot at styret og leiinga i selskapet kunne få bruke hytta i inntil ti dagar i året. Avtalen gjeld i tre år med rett til forlenging, og blei underskriven av Skrøvseth, Maridal og ein medlem i styret. Maridal seier til avisa at han ikkje likte at det blei gjort på den måten og at han bad Skrøvseth ta kontakt med revisor.

Ønskjer ro

Skrøvseth seier til Adresseavisen at han alltid har vore hundre prosent lojal mot styret i Svorka. Til NRK Møre og Romsdal seier han at det Adresseavisen skriv, er tatt ut av samanhengen og derfor gir eit feil bilete.

Sist veke hadde eigarane i Svorka og styret møte, og ordførar Mons Otnes i eigarkommunen Surnadal seier til NRK at dei no håpar på ro omkring denne saka. Styreleiar John Ole Aspli seier at styret har gått gjennom revisjonsrapporten og har konkludert med at Skrøvseth ikkje medvite har brote lovverket. Styret går derfor ikkje til politiet med saka. Han seier også til Tidens Krav måndag at Svorka Energi ikkje har tapt ei krone på det som er skjedd.

Eigarane har bedt juristar om å vurdere styret si rolle, og ventar no på ein rapport.

Siste video/lyd

Mange geitebønder i landet vil ha den elektriske geiteklaven til Gjemnesbedrifta Nofence. Produksjonen pågår for fullt, men geiteklaven er enno ikkje godkjend. Gründerbedrifta treng beitesesongen 2017 for å gi Mattilsynet dokumentasjonen dei krev.
Dei fleste har meir enn nok med å SJÅ utfor kanten på den hundre meter høge Zakariasdammen i Tafjorden på Sunnmøre.
Men det finst folk som vil betale for å få seg ein luftig tur. Og frå neste veke av kan dei gjere akkurat dét...
Fiskesperra som skal redde den nasjonale lakseelva Driva, blir slakta av ekspertar på behandling av gyrosmitte. Miljødirektoratet er ansvarleg for prosjektet til seksti millionar kroner. Dei meiner det trengst berre små justeringar.