Medan seniorane sankar medaljar i VM, manglar det ikkje på talent også blant yngre langrennsløparar.
Då det norske laget tok sølv under stafetten i ungdoms-OL i Liechtenstein i januar, var det med 18-åringen frå Stordal på siste etappe. I tillegg kan Øvrebust skilte med ei individuell bronsemedalje frå meisterskapen.
– Det er jo kjekt at det går så bra. Du får igjen for jobben du har gjort heile året, seier Øvrebust.
Den jobben består mellom anna av 600 treningstimar.
– No i sesongen blir det mindre enn elles for å vere klar til konkurransane, seier Øvrebust.
Motivert av gode resultat
– Eg har gått på langrenn så lenge eg kan huske. Og det har alltid vore slik at eg har hatt lyst til å vinne mi klasse, seier Øvrebust.
– Så då har eg vel halde fram med det – å ville vere best heile tida.
Under NM i fjor tok ho gull i si klasse, nesten eitt minutt framfor nummer to.
– Eg kan få gode plasseringar, men likevel ikkje vere fornøgd med løpet. Så det beste er nok når både forma og plasseringa stemmer, seier ho.
– Viktig med gode førebilete
For skikrinsen er det viktig med gode førebilete for unge som ønskjer å satse.
– Det er klart det er viktig, seier Stig Aambø.
Han seier Øvrebust er ein spydspiss i si klasse.
– Det er eit trongt nålauge i Noreg, men ho har gjort det godt både i fjor og i år, så det blir spennande å følgje med vidare.
Han nemner også Mari Støen Gussiås frå Molde og Ingvild Øye frå Hovdebygda som viktige ambassadørar.
Går for pallplass
For Øvrebust er det neste store målet junior-NM i Trondheim i mars.
– Håpet er pallplasseringar, seier ho.
– Er det eit mål på sikt å konkurrere med dei beste seniorane?
– Eg vil halde på så lenge det er gøy, men det er mykje som skal klaffe. Eg trur ikkje folk forstår kor langt det er frå å vere blant dei beste 18-åringane i Noreg og til å konkurrere på seniornivå, seier Øvrebust.