Salet av skisenteret på Stranda skal kontrollerast

Stranda kommune er i ein svært vanskeleg økonomisk situasjon og er den kommunen i landet med høgast gjeld. Sal av Strandafjellet skisenter har vore naudsynt. I går vart det klart at dei lokale investorane Frode Håkon Kjølås, Per Magne Grøndahl og Bjarte Tunhold får kjøpe skianlegget for56 millionar kroner.

– Vi skal no gå gjennom mange ulike sider som har med utbygginga på fjellet å gjere, og sjølve salsprosessen, seier leiar i kontrollutvalet, Inge Gjærde.

LES OGSÅ:

• – Ingen andre kommunar i landet er vanskelegare stilt enn Stranda
• Eigedomsskatt, rådhussal og opning for sal av «arvesølvet»
• Stranda-rådmannen har sagt opp

Summen var langt under det Stranda kommune treng og det må difor kuttast i kommunale tilbod. Kommunen har framleis ei restgjeld på 100 millionar kroner.

– Det var eit lett val å selje skisenteret. Kommunen har ikkje økonomi til vidare satsing på infrastruktur, vedlikehald og utbygging på fjellet, seier Gjærde.

Alle partia var samde då kommunestyret røysta over salet torsdag ettermiddag. Det dei ikkje har vore samde om er prosessen framfor salet.