I løpet av dei neste månadane skal dei fem tenestegjere på Siem Pilot og redningsskøyta Henry von Koss i Middelhavet.
Oppgåva er å drive grensekontroll for Italia og Hellas, og samstundes hjelpe lyktningar i naud.
Krevjande jobb
Lensmann i Ørskog, Erik Steen Mikalsen, er ein av dei som i 2017 skal ha heilt andre arbeidsoppgåver enn dei han har i dag.
Siem Pilot er eitt av to norske skip som dei fem politimennene frå Møre og Romsdal skal tenesetegjere om bord i.
Foto: NRK
Dei norske båtane har vore med i arbeidet med å redde 35.000 menneskeliv så langt.
Lensmannen vert nestkommanderande for politistyrken om bord på Siem Pilot, eitt av to norske skip som deltek i den internasjonale Frontex-operasjonen i Middelhavet.
– Det er ein krevjande jobb og ein vert utsett for mange påkjenningar der nede, men eg føler eg har det som skal til for å kunne bidra på ein god måte.
Redda over 35.000 menneskeliv
Så langt har dei norske båtane vore med på å redde over 35.000 menneskeliv, men 4500 menneske på flukt i Middelhavet fekk aldri hjelp i 2016, dei drukna på veg mot Europa.
– Det er ikkje tvil om at det er tøffe inntrykk. Det er harde påkjenningar for dei som har delteke og vi som skal delta, seier Ørskog-lensmannen.
– Er du førebudd på det du kjem til å møte der?
– I det omfanget som kjem til å møte meg der, så er eg nok ikkje 100 prosent førebudd.
Det skal vere 10 politi ombord, 11 helsepersonell og eit mannskap på 15. Dei andre politimennene frå Møre og Romsdal er Joachim Olsvik, Per Arne Dahle, Øyvind Kvalvåg og Karl Idar Vik.
