Mannen i Rauma er eitt av dei mest overvaka fjellpartia i landet. Radarar og anna måleutstyr er permanent plassert i fjellsida for å varsle om nye rørsler.
I september oppdaga geologane aktivitet i ein ny del av fjellpartiet, litt vest for området der eit større ras ein dag vil komme. Raset er venta å tilsvare 4000 lastebillass og folk i området blei varsla om faren.
- Les også:
Har auka beredskap
Sjølv om raset ifølgje geologane kan gå når som helst, skal det ikkje vere fare for folk. Raset blir stort, men er ikkje venta å bli stort nok til å nå hus eller veg i nærleiken.
Det er Åknes Tafjord Beredskap IKS som har ansvaret for å overvake fjellsida. Gjennom helga har dei auka beredskapen for å fange opp eventuelle endringar. Det seier vakthavande geolog Einar Anda.
– Vi har alltid ein geolog på vakt, men normalt sjekkar vi målingane ein gong i døgnet. No sjekkar vi dette området tre gongar for å vere på den sikre sida, seier han til NRK.
Til no i helga er det ikkje registrert unormal aktivitet i fjellsida.
Ligg i radarskugge
Partiet som kan rase ligg like vest for skredområdet som blir overvaka. Det blei oppdaga i samband med at geologane i september plasserte radarar i nye posisjonar. Anda seier dei ikkje har direkte sikt til området no, men at dei overvakar hovuddelen.
– Sjølve den delen som kan rase no ligg i ein radarskugge. Men vi følgjer med på rørslene der kan forplante seg til resten av området. Vi har ikkje grunn til å tru at det vil skje, men vi vil gjerne vere sikre, seier han.
Måndag skal geologar opp for å plassere ein radar i same posisjon som då rørslene blei oppdaga i september. Dermed kan dei få meir nøyaktig kunnskap om utviklinga.
Blir varsla på sms
I tillegg til dei tre sjekkane i døgnet vil utstyret også melde frå dersom det blir registrert unormale rørsler i raspartiet i Mannen.
– Ved større utslag blir geologane varsla automatisk via sms. Så vi er relativt trygge på at vi fangar opp det som skjer, seier Anda.
I tillegg til å ha ein geolog på vakt er det alltid ei teknisk vakt på jobb for å sikre at alt utstyr fungerer som det skal.