Pingvintjuveriet: Sjekkar overvakingsvideo for seks døgn

Politiet har hatt god bruk for bileta frå overvakingskamera ved akvariet. Det var ved hjelp av desse bileta dei kunne slå fast at fleire russ hadde tatt seg inn på området.

• Les også: Fire personer siktet for pingvintyveri

Sjekkar om andre kan ha vore inne

Sunnmøre politidistrikt opplyser laurdag ettermiddag at den siste offisielle teljinga av pingvinungane vart gjort 8. mai. Årsaka er at fuglane skal ha mest mogleg ro i hekketida, og dei tilsette held difor avstand dersom det ikkje er naudsynt å kome nær rugekassene.

– Det blir etterforska breidt, og mellom anna undersøkjer vi opptak frå dei siste seks dagane for å sjå om det også kan vere andre som har vore inne på området, eventuelt å sjå bort frå dette, seier politiinspektør Yngve Skovly.

• Les også: Mener russen er blitt urettferdig behandlet
• Les også: Russen beklagar pingvin-tjuveri

Fire er framleis sikta

Overvakingsvideoen har vist at sju personar var inne på området.

– Tre av dei sju har status som mistenkte, medan to kvinner og to menn førebels er sikta for brot på dyrevelferdslova, seier Skovly.

Dei fire held framleis fast ved at dei ikkje har tatt med seg pingvinungane, men vedgår at dei har vore på innsida av gjerdet.

Skovly seier dei ønskjer kontakt med personar som kan ha bilete eller andre opplysningar som kan vere av interesse.

– Politiet byggjer ei tidslinje for å få klårleik i kva som har skjedde. I den inngår mellom anna bilete frå beslaglagde mobiltelefonar, avhøyr og tips.

• Les også: Fryktar for livet til pingvinungar: Avhøyrer russ om tjuveri