Kenny Quinn er kjapt ute med å avleie merksemda før han forsyner seg av lommene til dagens offer.
Foto: Lena Høyberg / NRKKenny Quinn har lært triksa sine frå ein gamal meister. Så god har han blitt, at han til dagleg viser fram triksa sine i sirkusmanesjen.
– Alt eg tar frå publikum, får dei tilbake, forsikrar han.
– Eg viser berre fram kva som er mogleg, så folk veit at dei må vere merksame.
I samarbeid med politiet i Ålesund viste han i dag korleis han enkelt kan plukke reint lommene – også til ein driven etterforskar.
Tok nøklane til politihuset
Det er fort gjort å stele det meste av innhaldet i lommene.
Foto: Lena Høyberg / NRK– Du må hugse å passe på klokka di, seier Quinn, medan han held fram med å snakke. Frode Haugen nikkar, og følgjer med. Likevel forsvinn både bilnøklane, lommeboka og nøklane til politihuset på få sekund.
Frode Haugen er sjef for tryggleiken under festivalen Tall Ships Races i Ålesund i sommar. Han er særleg opptatt av at folk må vere merksame der det er mykje folk.
– Eg fokuserte på det han bad meg om, og då merka eg ikkje at det var heilt andre ting han forsynte seg med, ler Haugen.
Han ber folk vere særleg merksame i sommar når festivalsesongen står for døra.
– Der det er mange samla, veit vi at sjansane er større for å bli lurt, seier han.
– Og folk må vite at dei kan gjere nok sjølve for å inngå det, seier Quinn.
Quinn sine råd for å unngå å bli rana
- Hald avstand til framande
- Fordel pengane i fleire lommer heller enn å gå med lommebok
- Ha veska framme på kroppen og ikkje bak på ryggen
- Ikkje vis fram kva du har i lommeboka når du betalar
