Som 22-åring bestemte Severin Rønes for å flytte til den veglause garden Røneset i Sykkylven, som besteforeldra forlèt i 1967. Der ville han finne roa og leve tett på naturen.
I mars 2015 gjekk den aller første episoden om Severin på lufta på NRK. Ideen bak var å fylgje einebuaren sin kvardag, både når han gjer noko og ikkje. Serien er produsert av Elin Helgheim i NRK Hordaland i samarbeid med NRK Møre og Romsdal.
Programmet har blitt ein suksess og publikum elskar å sjå Severin når han fiskar, går på hjortejakt, ryddar skog eller berre sit og drikk kaffi. I dag vart serien nominert til Gullruten.
– Det å bli nominert til Gullruten er ein siger i seg sjølv. Då veit eg at vi er plukka ut av veldig mange andre seriar. Eg vel å ta dette som ein siger så langt, seier Helgheim.
LES MEIR:
Sakte-tv
Severinserien er sakte-fjernsyn og inspirert av Minutt for minutt-produksjonane til NRK. Det er Severin, Røneset og Storfjorden som er i hovudrolla.
Elin Helgheim trur mange likar det rolege tempoet i serien og har høyrt fleire sjåarar seie at kvilepulsen går ned når dei ser på Severin.
– Severin sjølv er ein kar som deler kjenslene sine og er til stades i det han gjer. Det er ikkje berre ei oppleving, men ei innleving å sjå serien, seier Helgheim.
Annleis dokusåpe
Det kan verke som det skjer lite i kvar episode, men det er Helgheim usamd i.
– Det skjer meir enn ein skulle tru ved første augekast. Ein ser etter kvart at her er det jo noko på gang, seier regissøren. Og litt har jo skjedd sidan dei første opptaka på garden. Severin har fått seg kjæraste og Jelena Aurora Mensah er ofte å sjå på skjermen. Ho bur i Ålesund, men drøymer om å flytte til Røneset permanent på sikt.
Fredag er hovudrolleinnehavaren sjølv i Oslo for å delta på Gullrutens pressekonferanse. Han er glad for å bli nominert.
– Det er veldig kjekt, seier Severin Rønes.