Denne gongen skal nynorskens far, Ivar Aasen, heidrast på sjølvaste 17. mai.
– Eg gler meg til å vise fram ein stad i Møre og Romsdal på denne største festdagen i Noreg, seier direktereporter Pål Kristian Lindseth.
Sjå innslaga reporter Pål Kristian Lindseth og fotograf Øyvind Berge Sæbjørnsen laga i Hovdebygda 17. mai:
Frå Hovdebygda
Det er Ivar Aasen-jubileet som er årsaka til at NRK ønskte å sende frå Aasentunet denne gongen. Ivar Aasen blei fødd 5. august i 1813. Han er mest kjend som opphavsmannen til nynorsken. Men han er også ein anerkjend diktar.
– Det er langt frå alt som er klart før sendinga, seier Lindseth til NRK. Men eg kan love at eg skal stille i bunad på nasjonaldagen, seier han.
Aasentunet ligg på garden Åsen i Hovdebygda. Det var her Ivar Aasen blei fødd og vaks opp. I dag er dette eit nasjonalt dokumentasjons- og opplevingssenter for nynorsk skriftkultur. Det nye kulturbygget i Aasentunet blei opna i 2000.
Hovuddelen av sendinga går som vanleg frå Slottsplassen i Oslo. Her får sjåarane vere med på det store barnetoget som går opp Karl Johans gate og passerer Slottet med Kongefamilien på Slottsbalkongen.
- Les også: Vil ha berre norske flagg på 17. mai
- Les også: Falske påstandar spres på nett
Elles blir sjåarane tekne med til blomstring i Hardanger, til 150-årsjubileet for Edvard Munch på Løten I Hedmark og vi besøkjer naboane våre i sør i Selje ved Stad.
Eit anna høgdepunkt blir feiringa på Skaugum i Asker. Her kjem barnetoget ca. klokka 08.00 for å gratulere Kronprinsfamilien med dagen