Så overraska blir nybegynnar Håvard Elias over kastet sitt

For to veker sidan skjedde det som skulle få han til å elske discgolf enda meir. På discgolfbana i Vestnes fekk han hole in one, eller ace som dei kallar det, frå 94 meter.

– Det var stort for alle som var der, seier han.

– Flaks

Kompisen Stian Våtmyr filma kastet, og det var rein flaks – både at han klarte å treffe hole in one, og at det blei filma, meiner Håvard Elias Hovet Aas.

Videoen er delt på forskjellige sosiale plattformer, og fleire 100.000 har sett kastet.

– Det gjekk rett og slett viralt, og eg har fått mange positive kommentarar.

– Er det slik at du no berre må gi deg på topp etter få månader som discgolfutøvar?

– Haha, nei. Eg kan ikkje peake i ein alder av 30. Dette må eg fortsette med lenge, slår han fast.

Håvard Elias Hovet Aas starta med discgolf då det vart laga ei bane i Velledalen i heimkommunen Sykkylven tidlegare i år.

– Ellevill utvikling

Tal frå Norges amerikanske idretters forbund viser at det var 1034 personar som dreiv med discgolf i Noreg i 2011. Ti år seinare, i 2021, er talet 6607 aktive medlemmer. Og veksten held fram, seier Erik Hammer Staalesen, utviklingsansvarleg for disksport.

– Det er ei ellevill utvikling. Og desse tala er frå i fjor. Vi veit at det har auka sidan det. Sporten vår var ein av få det var mogleg å halde på med under korona, så vi fekk også ein god vekst i den perioden, fortel Staalesen.

Sjølv om det er lenge sidan hans første ace, kjenner han godt igjen kjensla Håvard Elias Hovet Aas fekk då han klinka til på bana i Vestnes for eit par veker sidan.

– Den første gongen du får ace er euforisk! seier Staalesen.

Han har sjølv drive med idretten i tretti år, og er veldig glad for at det poppar opp nye baner overalt i heile Noreg.

– Det er ein veldig billig sport å starte med. Dei fleste banene er gratis å spele på, og du må kanskje ut med rundt 500 kroner for ein startpakke. Det er ein idrett som får deg opp av stolen og ut i aktivitet, reklamerer han.