Ein rusa bilførar er sikta for promillekøyring i Kristiansund sentrum. Han førte ein liten varebil med sju passasjerar.
Åtte i liten varebil
Bilføraren var berre femten år. Han vart stoppa på Kongens plass i Kristiansund klokka 07.15. Då var den vesle varebilen full av folk.
– Bilen er registrert for to personar, seier operasjonsleiar Jan Helge Kjøl i politiet til NRK Møre og Romsdal. Han karakteriserer det heile som tankelaust og farleg.
Barnevernet blir med
Det er tatt blodprøve av guten.
– Vi prøver no å varsle foreldra. Barnevernet blir til stades under avhøyret som tar til snart, seier Jan Helge Kjøl i politiet til NRK.
Den 15 år gamle bilføraren kjem frå ein nabokommune til Kristiansund, opplyser politiet.
