Det var like før klokka 19 i kveld at brannvesenet fekk melding om sterk røykutvikling frå eit bustadhus i Elnesvågen i Fræna.
Ein eldre mann som budde åleine i huset, blei teken hand om av ambulansepersonell, og sendt til sjukehus med det som truleg er røykskadar.
– Det var svært kraftig røykutvikling på staden, men brannvesenet fekk raskt kontroll, seier operasjonsleiar hos politiet, Kjell Biesmas I Kristiansund.
Det er ikkje kjent om mannen har fått alvorlege røykskadar.
Fyr bak pipa
Det var først mistanke om at det kunne vere ein pipebrann i huset.
– Men det viste seg at det hadde tatt fyr i treverket bak pipa, seier Biesmas.
Det er omfattande røykskadar i ulike rom i huset. Men til alt hell fekk ikkje elden spreie seg: Dermed ser det ut til at ein har unngått alvorlege brannskadar på bygningen.
Brannvesenet er framleis på staden og driv etterarbeid.