Driftsresultatet for 2008 vart 542,3 millionar kroner for Tafjord kraft.
Meir enn dobling
- Dette er rekord, seier konsernsjef Sverre Devold.
I 2007 vart driftsresultatet 260,9 millionar kroner. Det var rett nok ein liten nedgang frå dei 311,7 millionane selskapet enda på i 2006.
Resultatet etter skatt vart på 212,6 millionar i fjor, mot 105,8 året før.
Takkar straumprisane i Europa
Konsernsjef Sverre Devold har to forklaringar på rekordresultatet.
- Det eine er at me fekk nok vatn i anlegga, så me lukkast med å halde alle i drift. Det andre er at me fekk den høgaste straumprisen me har hatt nokon gong, seier Devold.
I tillegg takkar han straumprisane i Europa.
- Me får stadig fleire kablar frå Noreg til utlandet, og dermed også stadig meir kraftutveksling mellom Noreg, Norden og Europa. Prisane på råvarer er utslagsgjevande for kraftprisen i Europa, og dermed påverkar det også prisen her, seier Devold, og nemner eksempel som kol, olje og CO2-kvotar.
Ligg an til rekordutbytte
Normalt tar eigarane ut oppimot 70 prosent av overskotet i utbytte. Devold reknar med dei kjem til å legge seg på det nivået i år og.
- Av eit resultat etter skatt på 212 millionar kroner ligg det an til eit rekordutbytte, seier Devold.
Det kjem til å ligge på rundt 150 millionar kroner.
Ålesund kommune eig 50 prosent av selskapet, og kan dermed ende opp med eit utbytte på 75 millionar kroner.