Råsterk krone uroar møbelbransjen

Nærmare 40 prosent av sysselsetjinga i møbelbransjen i Noreg er i Møre og Romsdal.

I Stordal kommune er møbelindustrien enormt viktig, med bedrifter som Vad, Stordal Møbler, Sitwell og Helland Møbler.

– Møbelindustrien er stor i heile regionen. I Stordal kommune og dei omliggjande kommunane så er det den viktigaste næringa, seier Charles Tøsse, ordførar i Stordal kommune.

• LES OGSÅ: Utfordringar for møbelindustrien
• LES OGSÅ: Møbelindustrien preges av økonomisk krise

Krona står sterkt i desse tider, noko som fører til at norsk møblar blir dyrare i utlandet.

– Når krona er sterk blir våre møblar veldig dyre.

– Då må vi spele meir på kvalitet og funksjon, og prøve å få kundane til å forstå at dersom ein kjøper kvalitet, så slepp ein å skifte ut møblane så ofte, seier Joakim Helland, dagleg leiar i Helland Møbler.

Saka held fram under bildet.

Dårlege tider kan få store ringverknader

Møbelbedriftene i Stordal har vore gjennom tøffe tak med omstrukturering og utflagging.

Frå om lag 400 tilsette ved tusenårsskiftet, er talet på sysselsette i bedriftene no nesten halvert.

– Det er framleis næringa med desidert flest sysselsette i Stordal, seier ordførar Tøsse.

Han håper næringa går lyse tider i møte.

– Ringverknadene i forhold til underentreprenørar er betydelege, fortel Tøsse.

Satsar internasjonalt

Dårlege tider i Europa gjer at ein må tenkje annleis for å nå ut med norske varer. Helland Møbler har spesialisert seg på møblar til offentlege bygg, som sjukehus og sjukeheimar.

– Vi kan levere det meste som skal inn i eit nybygg, slår Helland fast.

• LES OGSÅ: Salget av norske møbler stuper

Dei leverer mest til innanlandsmarknaden i augneblinken. Helland Møbler eksporterer òg, men framover vil dei satsa hardare utanlands.

– Vi har gjennom ei årrekkje bygga opp ein kompetanse innanfor pleie- og helsemarknaden. Vi har bygga opp ein stor produktkolleksjon som er tilpassa marknaden, seier marknadssjef i Helland Møbler, Geir Østrem.

– Og vi får gode tilbakemeldingar å internasjonale messer vi er på, og for oss er det på tide å ta steget vidare, fortel Østrem vidare.

Helland Møbler vil altså ut, blant mange møbelbedrifter i Stordal.

– Det er ingen fiendtlegheiter her i Stordalen. Vi samarbeider på nokre område, medan vi konkurrerer på andre, avsluttar Helland, med dei andre møbelbedriftene i tankane.