Elevar og foreldre reagerer sterkt på arbeidsforholda ved Kolvikbakken ungdomsskule i Ålesund. I fleire år har skulen vore arbeidsplass utan godkjenning av helsevernet i kommunen.
– Det er trongt her inne. Vi er 30 elevar i eit lite klasserom, fortel Christan Ødegaard Hamnes som er tillitsvalt i 8A.
– Det er 1,8 kvadratmeter per elev når ein skal ta med pult, stol og sitteplass. Det er veldig trongt, seier han oppgitt.
Skulle pussast opp i 2001
Torsdag gjekk elevar, foreldre og lærar til aksjon for skulen.
– Vi protesterer no fordi politikarane meiner at vi ikkje skal få pengar til å pusse opp skulen. Det skulle eigentleg vore gjort i 2001, fortel Hamnes.
Brakker kom på plass i 2001 som mellombels klasserom medan skulen skulle pussast opp. Med nye kuttforslag frå rådmannen risikerer Kolvikbakken å måtte vente endå fleire år på rehabilitering.
Vil ha spleiselag
– Vi har diskutert eigedomsskatt i mange år. No har det blitt bestemt at næringslivet skal sleppe skatten, noko vi synest er underleg. Her må det til eit spleiselag - ein dugnad - for dette må vi få på plass, seier bystyrerepresentant Sindre Nakken (Ap).
Varaordføraren meiner at sal av kommunale eigedomar kan betre økonomien, men å auke eigedomsskatten kan han ikkje vere med på.
– Vi har gått til val på å redusere eigedomsskatten, så å gå frå den vallovnaden til å auke skatten, det blir ein stor kamel å svelge, seier varaordførar i Ålesund Geir Stenseth (Frp).
– Andre bør vike
Nok er nok for Kolvikbakken. Uansett kommuneøkonomi meiner dei at det er deira tur no.
– No har vi venta så lenge at no må nokon andre må vike for oss, seier Jannicke Flo som sit i foreldreutvalet på skulen.
