Det uventa dødsfallet til Willy Henry Kleiven i Sunndal får følgjer for dei involverte. Nyleg slo Fylkeslegen fast at både operatøren og kommunen har brote helsepersonellova, fordi mannen ikkje fekk hjelp då han kjempa mot døden natt til 8. desember.
No vurderer politiet å vurdere om saka også skal få rettsleg etterspel. Politiadvokat Anders Skorpen-Trøen seier til NRK at dei no vurderer det nokså uvanlege steget å sikte kommunen for brot på helsepersonellova.
– Då må politiet vurdere om kommunen har vore grovt aktlause, og då er det organiseringa vi må sjå nærare på, og om kommunen har gjort helsepersonellet og dei som skulle arbeide på alarmsentralen i stand til å yte forsvarleg teneste, seier Skorpen-Trøen.
Politiet har avhøyrt ei rekkje tilsette, som skal ha fortalt om manglande rutinar og lite opplæring på alarmsentralen.
I rapporten frå Fylkeslegen kjem det mellom anna fram at alarmsentralen hadde 30 år gamle prosedyrar for handtering av tryggleiksalarmar, og store manglar i organiseringa og opplæringa.
Legg truleg vekk saka mot operatøren
Operatøren som var involvert natt til 8. desember blir truleg ikkje sikta, opplyser politiet. Vedkomande oppfatta ikkje dei fire alarmane frå Willy Henry Kleiven som alvorlege, og varsla difor ingen.
I rapporten frå Fylkeslegen kjem det fram at operatøren sat åleine på jobb, var ufaglært, hadde lite erfaring og avgrensa opplæring.
Fylkeslegen har avslutta saka mot operatøren, og politiet vil truleg gjere det same.
– Dersom feilen skuldast at organiseringa av verksemda har gjort det vanskelegare å yte forsvarleg helsehjelp, er det rettare å vurdere straffansvar mot verksemda enn mot det enkelte helsepersonellet som er sett i den situasjonen, seier Skorpen-Trøen.
Uvanleg reaksjon
Tidlegare i år fekk Helse Møre og Romsdal ei bot på 500 000 kroner etter at Sebastian Gils Ødegaard døydde i Kristiansund. Også den gongen for manglande organisering og brot på helsepersonellova. No kan også Kristiansund kommune bli felt for det same.
Kommunikasjonssjef Tore Lyngvær seier at kommunen eventuelt vil bidra så godt som råd.
– Det er ei alvorleg sak med tap av menneskeliv, så vi er ikkje overraska over at politiet vurderer å sikte kommunen, seier Lyngvær.
Det er statsadvokaten i Møre og Romsdal som tek endeleg stilling til om Kristiansund kommune blir sikta.
Les også: