Det var tysdag formiddag at ein rektor ved ein av vidaregåande skulane i Ålesund varsla politiet. Ein av elevane ved skulen hadde fått ei snapchatmelding som kunne oppfattast som ein trussel.
Politiet rykte ut til alle vidaregåande skulane i Ålesund med væpna og uniformerte politipatruljar. Etter dette starta det å sirkulere falske nyheitsartiklar om at fleire personar var skotne. No er ein person sikta for å fabrikkere falske nyheiter.
– Ein ung person busett på Sunnmøre er siktet etter straffelova § 187, andre ledd for å ha fabrikkert og distribuert falske nyheiter om trusselsaka, seier påtaleansvarleg i Møre og Romsdal politidistrikt Jan Roar Gidske ei pressemelding tysdag ettermiddag. Personen er altså ikkje sikta for å ha noko med trusselen å gjere.
Innrømmer forholdet
Politiet seier vidare at dei ser alvorleg på slike falske nyheiter fordi dei bidreg til å skape frykt og til å eskalere usikkerheita rundt trusselsituasjonen.
Politiet har gjennomført avhøyr av sikta, som har erkjent forholdet. Det er vidare tatt beslag i gjenstandar som er brukt til produksjon og distribusjon av den falske nyheitsartikkelen.
Bilete av våpen og ryggsekk
Tysdag føremiddag kunne ein elev ved Spjelkavik vidaregåande skule fortelje NRK at eit bilde hadde sirkulert i sosiale medium. På bildet kan ein sjå eit slags våpen og ein ryggsekk, med teksten: «Ålesund. Ikkje kom til skulen i morgon».
Tenåringen seier at ho ikkje veit kven som har sendt bilde, men at det har blitt spreidd til mange.
– Eg føler meg trygg, men mange er skeptiske. Det er mykje styr ved skulen i dag og mange som er redde for at det skal skje noko. Vi har fått beskjed av lærarane om å halde oss på skulen og at politiet tek hand om det, sa eleven til NRK.
Trur ikkje trusselen var reell
Politiet reiste ut til alle dei vidaregåande skulane med væpna og uniformerte politipatruljar. Dei meinte likevel at dei hadde så god oversikt over situasjonen at det aldri blei aktuelt å evakuere elevar og tilsette.
Tysdag ettermiddag opplyser politiet at det var eit bilde på Snapchat som utløyste aksjonen, men at dei ikkje trur at trusselen som vart delt er reell.
– Vi nærmar oss no ei løysing og vi har vore i kontakt med fleire andre politidistrikt og fått bistand til avhøyr, seier politiinspektør Yngve Skovly.
Politiet meiner at alt tyder på at Snapchatbilde blei produsert og distribuert i ein annan kant av landet og blei endra til å gjelde Ålesund av ein lokal ungdom.
Etterforskar saka vidare
Dei etterforskar framleis saka, men seier at dei no er tilbake i ein normalsituasjon.
– Alle kan dra på skulen som vanleg onsdag. Det vi må vere merksame på er at det kan vere ein del redde elevar etter det dei har sett med væpna politi og uniformerte styrkar, seier stabssjef Janne E. Garnes Nilsen. Ho seier det er viktig å snakke med ungdomane
Politiet kjem framleis til å vere synleg til stades ved vidaregåande skular i Ålesund kommune for å trygge elevar, føresette og tilsette, men ikkje i like stor skala.
Mykje rykte og usanningar
Rektor Ole Reinlund ved Ålesund vidaregåande skole seier at trusselen har påverka læringsmiljøet til elevane. Utgangspunktet for trusselen var eit bilete med tekst på som blei delt i sosiale medium.
– På ein, to, tre har alle elevane sett dette biletet. Og plutseleg trur alle at dei veit eit eller anna, seier Reinlund.
Han seier det har vore mykje rykte og spreiing av usanningar og at det har blitt eit utrygt skulemiljø på bakgrunn av dette.
Politiet ber om hjelp frå publikum til å stoppe delinga av bildet i sosiale medium.
– Vi oppfordrar dei som får bildet om å ikkje dele det vidare, og alle foreldre til å snakke med sine barn og ungdomar om dette.