Ein ny analyse viser at dei vel 3200 innbyggjarane i Vanylven stadig blir færre.
– Vi jobbar mot denne straumen. Det som tel for oss er å skape nye arbeidsplassar slilk at det blir aktuelt for folk å kome heim igjen. Vi kjem til å be om hjelp for å få statlege arbeidsplassar til Vanylven, seier ordførar Lena Landsverk Sande.
I følgje ein analyse frå fylkeskommunen blir innbyggjartalet redusert med 450 dei neste 14 åra. Sidan 2002 har innbyggjartalet stupt med 1100. Og tala tyder også på at i 2030 kjem ein tredel av dei som bur i Vanylven til å vere 67 år eller meir.
Krevande og langsiktig arbeid
– Dette er ein krevande situasjon som er vanskeleg å snu, seier assisterande fylkesplansjef, Ingunn Bekken Sjåholm. Ein vil gjerne vere optimistiskt, men det er ressurskrevande å stoppe ei fråflytting.
Og eit steg vidare, å skape vekst, er ikkje noko enklare.
– Det krev ein stor innsats både av kommunen og dei som bur der. Det krevst og at sentrale styresmakter og dei som påverkar rammevilkåra for kommunen er interessert i å halde oppe innbyggjartalet i bygdene, seier Bekken Sjåholm.
Lite merksemd om små bygder
Når ein kjem til det punktet er assisterande fylkesplansjef usikker på kva politikarane ønskjer, fordi ho synest dei er utydelege i spørsmålet om å oppretthelda nivå og verksemd i bygdene. Ho viser til ei stortingsmelding og byar og distrikt, der ho meiner mindre bygder får heller lite merksemd og omtale.
– Merksemda rundt bygder som ligg eit stykke unna byane, og som ikkje blir ein del av den veksten, er lita.
Men nokre lyspunkt er det. Nokre flyttar tilbake til heimkommunen, men vilkåret er at det er arbeid å få. Det kan vere utfordrande om ein skal ha jobb, og den utfordringa blir ikkje mindre viss det er eit par som ønskjer å busette seg. Arbeidet skal og helst vere tilpassa den jobben dei unge har skaffa seg.
I 2015 kunne det sjå ut til at utviklinga ville snu, men no peiker altså pila ned igjen. Og prognosene som viser framleis nedgang i folketalet er ikkje gode.
– Tala kan vi ikkje snakke oss frå. Men samtidig fortel dei unge at Vanylven er ein god plass å bu. Men stikkordet er - vi må ha arbeid til alle, slår ordføraren fast.