Dryge 13 månader etter at Sylvi Listhaug på dramatisk vis måtte forlate regjeringa er ho inne igjen, denne gongen som eldre- og folkehelseminister.
Det gler mange i heimfylket Møre og Romsdal, som i mange år har vore ein bastion for Framstegspartiet.
– Ho er ein knakande dyktig politikar og ein av dei mest populære i landet. Det får eg høyre stort sett kvar dag. Det er veldig gledeleg at Sylvi er tilbake i regjeringa, seier Frank Sve, leiar i Møre og Romsdal Frp.
Eit sterkt ønske
Ifølgje Sve blir Sylvi Listhaug ein tydeleg politikar i regjeringa.
– Ho er ein god talsperson for dei viktige sakene til regjeringa. Eldreomsorg er eit svært viktig område for regjeringa. Å få Sylvi inn der er svært positivt, meiner Sve.
Han har fleire gonger sagt at Sylvi Listhaug burde fort igjen inn i regjeringa etter at ho valde å gå av i mars 2018.
– Både våre veljarar og våre tillitsvalde har ønskt Sylvi inn igjen i regjeringa, seier Sve.
Lodve Solholm har fått mykje av æra for at Framstegspartiet har vore så store i Møre og Romsdal. Han sat på Stortinget i fire periodar mellom 1989 og 2009, var ein av Carl I. Hagen sine næraste støttespelarar – og kjem i likskap med Listhaug frå Ørskog.
– For meg er det ikkje uventa at Sylvi er tilbake i regjeringa. Ho ei drivande flink kvinne som eg har stor tiltru til, seier Solholm.
Fire frå Møre og Romsdal
Både Sve og Solholm kan glede seg over at heile fire Framstegsparti-politikarar frå Møre og Romsdal er inne i regjeringa.
I tillegg til Sylvi Listhaug er både Jøran Kallmyr (justis- og beredskapsminister), Jon Georg Dale (samferdselsminister) og Harald Tom Nesvik (fiskeriminister) inne i det gode selskapet.
– Vi har gjort ein solid jobb med omsyn til organisasjonsbygging og å bygge opp personar. Derfor er vi det desidert største Frp-fylkeslaget i landet. Vi har levert dyktige folk til Stortinget og til regjeringsapparatet i mange år. Det haustar vi fruktene av i dag. At vi får fire statsrådar frå Møre og Romsdal er heilt fantastisk, jublar Frank Sve.
Flyttar heim
Totalt er det faktisk fem frå Møre og Romsdal i regjeringa. Utviklingsminister Dag Inge Ulstein er frå Sula på Sunnmøre.
Torsdag kom Sunnmørsposten med nyheita om at Sylvi Listhaug flyttar heim til Ørskog på Sunnmøre i 2021. Men ho har planar om å bli pendlar etter den tid.
Listhaug har sjølv erfaring frå eldreomsorga i heimbygda. Ifølgje Wikipedia jobba ho som pleieassistent ved Ørskog aldersheim mellom 1995 og 2000.