Mannen har drive som hobbyfotograf i Ålesund og har eige fotostudio. Han er i 40-åra og er no sikta for seksuallovbrot mot fleire unge jenter. Etter at saka blei kjend i slutten av februar, har politiet no kome i kontakt med over 70 jenter som er blitt fotograferte av mannen.
– Desse jentene har stort sett teke direkte kontakt med politiet. Vi har også namn på jenter som vi har fått gjennom den innleiande etterforskinga, seier politiadvokat ved Sunnmøre politidistrikt, Inger Myklebust Ferstad.
- Les også:
– Det er unge jenter
Det er ikkje kjent om nokon av jentene som har meldt seg har vore utsette for noko kriminelt. Politiet ønskjer kontakt med jentene for å få eit bilete av kva som kan ha skjedd.
– Dette er for ein stor del unge jenter som har vore til han for å late seg avbilde. Det har vore modellfotografering og liknande, seier Ferstad.
- Les også:
- Les også:
– Vil snakke med alle
Mannen har halde på med modellfotografering på hobbybasis sidan 2008. Mange av jentene han har fotografert er i alderen 15-18 år. Mannen skal i stor grad ha kome i kontakt med jentene via sosiale medier.
– Vi ønskjer å snakke med alle jentene. Vi vil danne oss eit bilete av kva som har skjedd når dei har vore til fotografering hos mannen.
– Trur det er fleire
Mannen har nekta straffskuld. Då han blei arrestert blei han varetektsfengsla i fire veker, og politiet har teke beslag i eit stort datamateriale.
– Vi trur at det har vore fleire jenter som har vore til fotografering. Og vi oppmodar dei som har vore der om å ta kontakt med politiet.