Oslo-rock og R&B-pop til Jugendfest

Det er rockepunkarane i Oslo Ess og nye og spennande Truls som kjem til Ålesund.

– Truls er éin av dei mest spennande nye, norske artistane. Låta «Out of Yourself» er blant dei beste låtane som har kome frå norske artistar i år, seier Ante Giskeødegård.

Den daglege leiaren, og bookingsjefen, i Momentium, meiner den tidlegare Lukestar-vokalisten vil trollbinde publikum.

– Eg såg han live på by:Larm i vinter og det var fantastisk bra. Med delar av bandet til Karpe Diem, Something Sally, i ryggen var det ei stor oppleving.

– Truls har internasjonalt potensial, meiner Giskeødegård.

Trøkk-garanti

Medan Truls, eller Truls Heggero som han eigentleg heiter, går inn i popsjangeren, inspirert av R & B, hiphop og elektronika, er Oslo Ess ein heilt annan stad.

– Oslo Ess er kanskje det bandet som har gjort flest spelejobbar i Noreg det siste året. Dei har blitt eitt av dei beste rockebanda live.

Giskeødegård fortel at Oslo Ess spelar fredag 16. august, medan Truls spelar laurdag 17. august. Oslo Ess meiner Momentium-sjefen er ein stemningsvinnar.

– Det blir garantert trøkk og stemning når bandet står på scena under Jugendfest, avsluttar Giskeødegård.

I morgon, klokka 12.00, kjem det to nye norske artistar. Då i meir etablerte baner, seier bookingsjefen.

Frå før er 50 Cent, Rival Sons og Steve Angello klare for Jugendfest.

Les:

• 50 cent til Jugendfesten
• «Eitt av dei beste hardrockbanda siste ti åra» til Ålesund og Jugendfest
• DJ Steve Angello kommer til Ålesund