Optimisme trass færre nybygg

Frå januar til utgangen av mai blei det selt 20 prosent færre bustader i Noreg enn for same periode i 2013.

Også talet på i gangsette nybygg gjekk ned med 18 prosent. Det viser halvårstala frå Boligprodusentenes Foreining.

Fleire nybygg enn folketalsvekst

I Møre og Romsdal meiner produsentane det likevel er grunn til optimisme, trass i at tala viser nedgang også her.

Administrerande direktør i Boligprodusentenes Forening, Per Jæger, viser til at talet på nybygg er større enn det berekna behovet i fylket, ein tendens berre Møre og Romsdal og Rogaland kan skilte med.

–Vi reknar med at det blir bygd om lag 2000 nye bustader i Møre og Romsdal i 2014, seier Jæger.

Dette inneber at det blir bygd fleire bustader enn folketalsveksten skulle tilseie.

• Les også: Grunn til optimisme tross svake nybyggtall

Bustader og venta behov

Jæger set dette i samanheng med at næringslivet i fylket går godt, og at det difor er optimisme også i byggenæringa:

– Det verkar som at næringslivet i Møre og Romsdal går godt, og det gjer at fleire har økonomi til å kjøpe ny bustad. I tillegg har dei som bygger vore nøkterne i prisinga av bustader, og slik har marknaden fungert.