Oppdølsstranda mellom Sunndalsøra og Ålvundeid på riksveg 70 er svært skredutsett, og Trollheimstunnelen vil gje dei to kommunane ferjefritt samband.
Politikarane frå dei to kommunane fremja mellom anna kravet om å auke rassikringsløyvinga til ein milliard kroner. Ordførar Tove-Lise Torve (A) i Sunndal er full av pågangsmot etter å ha møtt den politiske leiinga i Samferdselsdepartementet.
- Må vere synlege
- Når folk er så interesserte i lokale prosjekt og vil arbeide for auka rammer til samferdsel generelt, så er eg optimist, seier ho. - Men jobben er ikkje gjort enno. Det blir mange møte i tida framover, og det er viktig fordi vi alltid må vere synlege og argumentere for kvifor prosjekta våre er viktige.
- Her handlar det om dei store prioriteringane på statsbudsjettet og den langsiktige Norsk transportplan. Derfor er det ikkje berre Samferdselsdepartementet og samferdselspolitikarar vi bør besøkje. Det er kanskje like viktig å argumentere i andre departement og i partia generelt.
Norsk transportplan
- Tida fram til Norsk transportplan skal endeleg avgjerast blir veldig viktig. Indre Nordmøre må få på plass rassikring i Oppdølsstranda av omsyn til liv og helse og næringsliv, og vi må byggje Trollheimstunnelen for å få ein større bu- og arbeidsmarknadsregion, seier ordførar Tove-Lise Torve.