Odin Årseth var ikkje ein gong fødd då planane om hoppbakkane i plast kom på teiknebrettet hos Spjelkavik Idrettslag i Ålesund. Men i dag var han førstemann utfor som yngstemann under det aller første krinsrennet i hopp som blir arrangert her.
– Eg håper verkeleg at eg greier å kome over 10 meter, seier 7-åringen like før han susar ut for hoppkanten laurdag ettermiddag akkompagnert av ei jublande folkemengde.
Les også:
Har øvd i to veker
Bak står mora Linn Årseth og fortel at guten begynte å hoppe for fjorten dagar sidan, og har fått blod på tann. Mora skuldar på aldren, men seier ho gjerne skulle gjort det same.
– Hadde eg vore yngre så hadde eg også gjort det, seier ho.
– Kva er så fascinerande med hopping?
– Det er vel tanken på å flyge litt, kjenne litt luft på kroppen, seier ho.
Håper plastbakkane skal lokke fleire
Og det er fleire som deler fascinasjonen over å vere i lufta. På 60- og 70-talet var det eit levande hoppmiljø på Sunnmøre. Det var hoppbakkar i svært mange bygder, men snøfattige vintrar sette ein stoppar for aktiviteten. No håper entusiastane på ein ny vår for hoppsporten.
– Draumen er at vi blir ein god gjeng her på 50–100 hopparar på Sunnmøre på litt sikt, seier Terje Bergset i Møre og Romsdal skikrets.
Offisiell opning sommaren 2017
Dei to første bakkane på 12,5 og 25 meter er no opna i Spjelkavik, og neste sommar blir også ein 40 meter lang bakke klar.
Sebastian Foss Solevåg og Løset-systrene frå Spjelkavik hevdar seg i verdstoppen på alpint. Perry Holen i Spjelkavik Idrettslag trur hoppmiljøet kan fostre nye skistjerner frå området.
– Det beste som kan skje er at vi får masse gutar og jenter som kjem hit for å hoppe, seier han.
Eldstemann nesten 80 år
Kåre Holmen (77) frå Skodje er seks gongar verdsmeister i hopp og kombinert, og har til saman 25 VM-medaljar. Han har ikkje tenkt å gje seg med det første, og skryt av det gode seniormiljøet på Sunnmøre.
– Det er spenninga, det er kjempegøy å halde på med, seier han, og fortel at han har mist begge skia under hopp, men aldri vore spesielt redd.
Ikkje redd for å falle
Det er heller ikkje frykt som pregar 7 år gamle Odin Årseth, som hoppa seks meter i sitt første offisielle renn laurdag. Ingen av kompisane er førebels med i bakken, men sjølv gir han seg ikkje, sjølv om han skulle falle.
– Dersom eg går på trynet vil eg berre reise meg opp igjen og fortsette og fortsette og øve heile tida, slår han bestemt fast.