I skjergarden ved Rosvoll på Smøla er Frank Spetland, fagleiar hos Norsk Hummar, godt i gang med å sleppe ein hummar ut i sjøen.
Ei delikatesse til mange hundre kroner kiloen blir dermed sleppt fri, og å kaste hummar på sjøen er kanskje ikkje det dei fleste assosierer med å tene pengar på hummarfiske. Men det heile er ein del av ein større plan.
– Det er denne her som skal bidra til at vi kan fiske opp hummar i neste omgang, seier Hannasvik medan han slepp ein ny hummar ut i sjøen.
- Les også:
Aukar sjansen for å overleve
Hummaren blir nemleg hausta for rogn før den blir sleppt ut att i sjøen.
– Her kan du sjå at fargen på hummaren har endra seg, så her har vi ein rognhummar som er ganske klar til å klekke, forklarar Annicken Myran Aunhaug, driftsleiar i Norsk Hummar, medan ho tek ein hummar opp av eit stort kar.
Hummarlarvane blir klekt i lukka anlegg og ført tilbake der mora blei fiska. Det bidreg til å auke sjansen for å overleve med fleirfaldige gongar.
Frå berre 0,6 prosent sjanse for å overleve når dei blir klekt i det fri, så aukar sjansen til 15 prosent med denne metoden.
– Dersom om lag 30 av 200 overlever, så er vi fornøgde, seier Aunhaug.
- Les også:
Ønskjer å skape verdiar lokalt
Tilbake på sjøen er det klart for å sleppe fri dei knapt to veker gamle larvane.
Frank Spetland fagleiar hos Norsk Hummar, har tro på at samarbeidet med lokale fiskarar vil lønne seg.
– Vi ønskjer å skape verdiar lokalt som blir verande lokale. Sjølv om vi skal drive med eksport er det dei lokale som har kjennskap til områda og som veit kvar hummaren er. Dermed kan dei hjelpe oss til å finne dei beste plassane for å sette ut att hummaren, seier han.