Propellen utan aksling er klar til bruk 6 år etter at oppfinninga blei presentert. Den nye propellen er montert på bilferja Eiksund. Og kapteinen skryt av vidunderet.
– Det er mykje lettare å manøvrere ferja. Det er vasstraumen gjennom propellen som styrer ferja, og ikkje kombinasjonen av fast propell og ror, forklarar kaptein Helge Strand.
Ferjeselskapet Fjord1 likar god å legge til rette for ny teknologi. Det handlar om å hauste ein miljøgevinst.
– Fjord1 transporterer store verdiar kvart år. Vi ønskjer å vere med på å utvikle nye ting for å redusere utsleppa våre, for å få betre komfort for dei reisande og for å skape meir pålitelege framdriftssystem, seier teknisk sjef Glenn Sandberg.
Bilferja Eiksund er slett ikkje blant dei nyaste i Fjord1-flåten, og utanpå ser ho omlag ut som før. Men nede i maskinromet er det endringar. Store dieselmotorar er bytta ut med elektromotorar. Desse elektromotorane driv dei aksellause propellane.
– Anlegget reduserer bruken av brennolje både under overfarten og under manøvreringa til å frå kai, forklarer Knut Andresen i Brunvoll A/S.