Norske kinoar vil ikkje vise «Black Widow»

Den nye storfilmen i Marvel-universet har noregspremiere på kino 7. juli. Delar av den er spelt inn på Sæbø i Ørsta, men det blir ikkje mogleg å sjå filmen på den lokale kinoen.

Grunnen er at «Black Widow» blir sleppt på straumetenesta Disney + mot ekstra betaling, berre to dagar etter kinopremieren.

– Hadde gledd oss til å vise ein film som var spelt inn her

Janne Skarstein er kinosjef i Ørsta. Ho seier dei veldig gjerne vil vise filmen med scener frå sin kommune, men at dei ikkje kan vere med på avtalen som Disney legg fram.

– Det er rett og slett stussleg. Her har vi gått å gledd oss, og så går det ikkje. Det kunne ikkje ha vore noko meir trist eigentleg.

For at det skal vere verdt å vise filmar på kino, meiner Skarstein at det må gå litt tid før dei også blir tilgjengelege på nett.

– Filmane er laga for det store lerretet. Vi syns det er synd at dei skalerer det ned til ein TV-skjerm eller mobiltelefon, og at det skal vere plattformen filmane blir sleppt på. Det er ikkje rett for publikum, seier ho.

Ekstase i bygda

Amina Kvistad Jelti jobbar på den lokale Jokerbutkken på Sæbø. Ho seier det var ekstase i bygda då filmen vart spelt inn.

Mange nysgjerrige kom for å sjå om dei fekk eit glimt av det som føregjekk. Jelti syns det er kjipt at ein ikkje kan sjå filmen på kino i kommunen.

– Den har jo klipp herifrå, og det er kjekt å sjå bygda si på kino. Du får ikkje den same følelsen og effekten av å sjå det på TV heime i stova, seier Jelti.

Les også: – Plutseleg var der fleire som såg ut som Scarlett Johansson på Sæbø

Vil beskytte kinoane

Kino-organisasjonen Film og Kino, meiner at norske kinoar ikkje bør vise filmen «Black Widow».

– Vi godtek minimum 45 dagar frå kinopremiere til filmane kjem ut på andre tenester, seier administrerande direktør Guttorm Petterson.

Til dei som har gledd seg til å få sjå heimkommunen sin på kino, seier Petterson at det er frykteleg synd.

Får dårlegare tilbod, til same pris

Jannicke Haugen i Nordisk Film Kino, seier dei nektar å sende filmen «Black Widow» på sine kinoar.

– Viss kinovindauget blir korta ned, skal filmen vere billegare. Men det er ikkje Disney interesserte i å diskutere. Då er heller ikkje vi interessert i å vise filmen.

Vil ikkje kommentere

Nordisk Film og Kino og Film og Kino seier dei forhandlar med Disney, om å få eksklusivitet til nye filmar i ein viss periode. Men at Disney ikkje vil gå med på det for alle filmar.

Mattias Vestin i Disney sitt nordiske pressekontor svarer kort i ein e-post til NRK, at dei ikkje vil kommentere saka.

Desse stadene skal vise filmen på kino: Alta, Kirkenes, Lakselv, Narvik, Vardø, Bergen, Berlevåg, Dokka, Eidsvoll, Florø, Fredrikstad, Glomfjord, Grimstad, Kolvereid, Kvinesdal, Måløy, Nordkapp, Lillestrøm, Moss, Oslo, Sandnes, Sarpsborg, Ski, Skien, Sotra, Stavanger, Ålesund, Porsangmoen, Risør, Tromsø og Åndalsnes.