Slik får Nomeda bort sveittelukt i ullkleda

I snøen utanfor huset til skreddaren på Sunnmøre ligg bunader og ulltøy på rekke og rad. Nomeda Kimsås er frå Litauen og brukar å gle seg til vinteren kjem.

– Snøen er jo nesten som ei vaskemaskin. Den har same funksjon, seier Kimsås.

Når ho legg klesplagga ute i hagen på denne måten, passar ho på at snøen ikkje er våt. Er den våt, heng ho heller plagga på ein kleshengar utandørs.

Poenget med denne luftinga er å få bort lukt frå plagga, utan å måtte bruke vaskemaskin.

– Ull har ein heilt unik eigenskap og reinsar seg sjølv. Det er unødvendig å vaske eller reinse ulla med kjemiske midlar, seier Kimsås.

Lukta forsvinn

Kimsås driv si eiga systove der ho lagar bunader og andre klede. Det er familiens eigne bunader som får ein omgang i naturens «vaskemaskin». Kimsås kastar gjerne litt snø på ullplagga også. Fukten i snøen er positivt for luftinga.

– Det er kjekt å få frisk luft i klesplagget. Sveittelukta forsvinn under luftinga. Også matlukt og bållukt blir borte, seier Kimsås.

Ho synest det er artig å legge kleda ut i hagen, og tenker at slik blei det også gjort i gamle dagar.

– Før brukte folk å hive ut ullplagg og lufte dei. Og linskjorter blei lagt i snø og sol for å bli bleika, seier Kimsås.

LES OGSÅ:

• Kval med plast i magen skapte ny strikketrend
• Dette tøystykket er romertidas «jeansstoff»

Snø og luft til reingjering

Ingun Grimstad Klepp er seniorforskar ved Forbruksforskningsinstituttet SIFO, OsloMet. Ho seier at både snø, luft og kulde kan bidra til å gjere kleda våre reinare.

– Kulde er perfekt for å få bort midd og andre småkryp i sengetøy, madrassar og stoppa møblar, som elles er vanskeleg å vaske, seier Klepp.

Snø kan brukast som reinsemiddel til blant anna golvteppe. Då gnir ein snøen inn i teppet og ristar den av etterpå.

Når det gjeld ullklede er lufting ein effektiv måte å fjerne sveittelukt på.

– Då er det fuktig luft som er best. Det kan gjerast både inne på badet eller ute, seier forskaren.