Valet er over og det er også konstitueringa med ordførarar, varaordførarar, formannskap og utval. Og no teiknar det nye biletet seg: Kvinnene har for alvor innteke ordførarstolane i Møre og Romsdal.
Tove Henøyen frå Senterpartiet er den første kvinna i Fræna som skal ha ordførarkjedet på seg. Ho tykkjer det er ei ære å få dette vervet.
– Det er ærerikt å få lov til å bli ordførar i Fræna. Og det er ekstra stas å få vere den første kvinnelege ordføraren.
Også i Vanylven er det første gong at det er ei kvinne som er ordførar. Lena Landsverk Sande blir ordførar der.
– Veggen med bilete av ordførarane her inneheld berre bilete av menn. Og det er veldig kjekt å få æra av å vere den første kvinnelege. Det kjem no inni historiebøkene, men det er no ikkje det som er grunnen til at eg vil vere ordførar, seier ho.
– Det er ein utruleg spennande jobb. Og eg veit eg kan bidra på mange område.
Det er altså 9 kvinner som blir ordførar i Møre og Romsdal. Her er heile lista:
- Aure: Ingunn Golmen (Sp)
- Averøy: Ingrid Rangønes (Ap)
- Fræna: Tove Henøen (Sp)
- Stordal: Eva Hove (Ap)
- Surnadal: Lilly Gunn Nyheim (Ap)
- Tingvoll: Milly Bente Nørsett (Ap)
- Vanylven: Lena Landsverk Sande (V)
- Ørskog: Karen Simonnes Aanes (Ap)
- Ålesund: Eva Vinje Aurdal (Ap)
Arbeidarpartiet har 6 av dei kvinnelege ordførarane. Senterpartiet har to, og Venstre har fått fram éin kvinneleg ordførar i denne perioden.
Eva Vinje Aurdal (Ap) er ikkje berre ordførar i Ålesund. Ho er også leiar i likestillingsutvalet i Møre og Romsdal. Ho har ofte påpeikt at dei lokalpolitiske topp-posisjonane har vore skeivt fordelt mellom menn og kvinner.
Ho er no blitt den første kvinnelege ordføraren i Ålesund.
– Det er veldig bra. Vi er på rett veg. Men vi er ikkje nøgde enno. Vi har ein del å gå på. Eg meiner det er naturleg å tenkje at det skal vere halvparten av kvart kjønn, seier Eva Vinje Aurdal.