I dag, måndag 2. juni, får første pulje av 10.klassingar vite kva fag dei kjem opp i til munnleg eksamen. Men tilgangen på sensorar kan bli vanskelegare i år enn tidlegare.
Alt i februar melde NRK Møre og Romsdal at eksamen kunne stå i fare fordi mange lærarar nekta å stille som sensor. No har lærarane i Sykkylven, Stordal og Ørskog sagt klart nei.
- Les også:
Etterlyser opplæring
Lærarane meiner dei ikkje har fått den opplæringa dei treng etter at eksamensforma blei endra i år.
– Vi har etterlyst opplæring i mange år. Og det er arbeidsgjevaren si plikt å gje denne opplæringa. Dette burde ha vore på plass for lenge sidan, seier leiar i Utdanningsforbundet, Kristin Ræstad Giskemo.
– Men løyser det noko å ikkje stille som sensor?
– Det må vere lov å seie nei når ein ikkje føler seg i stand til å ta på seg ei oppgåve, seier Giskemo.
Kristin Ræstad Giskemo avviser at sensornekten har noko med det omstridde lønsoppgjeret å gjere. Men fleire andre lærarar som NRK har vore i kontakt med seier det er stor frustrasjon over at lærarane må opphalde seg på skulen i større del av arbeidstida.
- Les også:
- Les også:
– Største problemet nokon gong
Utdanningsdirektør i Møre og Romsdal, Alv Walgermo stadfester at det har vore langt verre enn elles å skaffe sensorar i år.
– Det er fyrste gong vi har stått overfor denne utfordringa, seier han. Han legg til at utdanningsavdelinga vil vurdere å betre opplæringa av lærarane for å setje dei i betre stand til å ta på seg arbeid som sensor.
- Les også:
– Har funne løysingar
Walgermo seier at sensornekten har oppstått i ein avgrensa region. Han har vore i kontakt med Utdanningsdirektoratet og får opplyst at det ikkje er problem med å skaffe sensorar andre stader i landet.
– Vi bad om ein rapport tidlegare i vår. Vi bad då skulane om å gjere alt dei kunne for å skaffe nok sensorar. Dei har no gått ut til andre kommunar og det har ordna seg slik at alle elevane får gjennomført munnleg eksamen, seier Walgermo.
- Les også:
Slik er den nye ordninga
Den nye eksamensordninga for munnleg eksamen i ungdomsskulen blei vedteken i 2013 og blir gjennomført for fyrste gong i år. Under munnleg eksamen skal elevane først ha ein obligatorisk førebuingsdel der elevane skal førebu ein persentasjon i samband med eit tema.
Elevane får vite kva fag dei har kome opp i 48 timar før eksamen. Tema eller problemstilling får eleven oppgitt 24 timar før eksamen.
- Les også:
– Arbeidsgjevar gjer ikkje plikta si
Kristin Ræstad Giskemo i Utdanningsforbundet seier til NRK at målet med sensornekten er at arbeidsgjevaren skal høyre på dei tilsette og gje lærarane ei felles opplæring i korleis den nye munnlege eksamensforma skal forståast.
– Eg vonar dei legg merke til aksjonen. Vi tykkjer den nye ordninga er vag og vanskeleg å tolke og forstå. Dermed etterlyste vi felles kursing for å få noko felles i botnen, slik at vi kan praktisere ordninga likt. Det er frivillig å vere sensor. Vi tykkjer det er rart at vi ikkje har fått opplæring i den nye eksamensforma. Her har ikkje arbeidsgjevaren gjort det dei pliktar å gjere, seier Ræstad Giskemo.