Ottar Brage Guttelvik seier nei til Nordøyvegen.
Foto: Trond Vestre / NRK– For dyrt, seier fylkesrådmann Ottar Brage Guttelvik.
Nordøyveg-prosjektet har blitt diskutert i fleire tiår, der dei første planen kom tidleg på 60-talet. I dag fredag skulle fylkesrådmannen kome med si tilråiing. Han seier nei. Fylkeskommunen kan ikkje ta på seg eit slikt prosjekt.
– Fylkeskommunen har allereie eit for høgt driftsnivå der ein må nytte fond for å balansere budsjettet i komande økonomiplanperiode, fortel Guttelvik til mrfylke.no.
– Ei realisering av Nordøyvegen vil gi ei netto auke i driftsutgiftene for fylkeskommunen på mellom 31 og 137 millionar kroner kvart år fram til 2048. Dermed må i så fall fylkeskommunen stoppe all anna investering i mellom 25 og 30 år.
Til saman vil prosjektet koste fylkeskommunen 3,4 milliardar kroner i netto driftskostnader.
Lei seg for avgjersla
Guttelvik fortel, at dersom prosjektet blir realisert, må ein kutte innanfor samferdsel, utdanning, tannhelse og regional utvikling. Fylkesrådmannen fortel at tala var umogleg å kome unna.
– Sjølv om ein legg dei gunstigaste føresetnadene til grunn, vil realiseringa av prosjektet auke driftsutgiftene med i gjennomsnitt 71,6 millionar kroner kvart år. Det er meir enn fylkeskommunen kan handtere, slår Guttelvik fast.
Vidare seier han at det er trist at utfallet ikkje er eit anna.
– Eit fastlandssamband vil truleg gi store positive effektar for bu-, arbeids- og servicemarknaden på Nordøyane og i resten av regionen.
No skal saka opp hos politikarane i fylket. Først i samferdselsutvalet 21. august, deretter i fylkesutvalet, før saka skal opp på eit ekstraordinært fylkesting 27. august.
Saka blir oppdatert.
