Nathaniel (12) har endå ikkje møtt klassekompisane – kommunen krev pause i streiken

Fire veker ute i skuleåret har Nathaniel Hervik Thorbjørnsen (12) framleis ikkje møtt klassen sin på Bekkevoll ungdomsskole i Molde.

Torsdag gjekk kommuneleiinga i Molde til det uvanlege steget å be om dispensasjon for alle lærarane, slik at dei 426 elevane kan kome tilbake til skulen i fem dagar.

– Eg skulle ha begynt i åttande, men det blei ikkje noko av på grunn av streiken. Eg synest det er veldig synd, for eg hadde gledd meg skikkeleg, seier Nathaniel Hervik Thorbjørnsen (12).

– Svært faretruande signal

Streiken har vart sidan tidleg i sommar og uro for borna har ført til at fleire har slått alarm dei siste dagane.

Kaja (11) er redd for at ho skal bli dum, barneombodet er uroleg for situasjonen og foreldre i Lillestrøm og Bergen har sendt brev til regjeringa.

Også Molde kommune varsla Statsforvaltaren tidlegare denne veka om at situasjonen for mange av dei unge er så utfordrande at streiken ikkje kan halde fram.

– Vi ser svært mange bekymringsmeldingar no. Dette er på toppen av to år med pandemi der vi har vore uroa for psykisk helse og sosial omgang. For desse elevane er det svært faretruande signal vi får, seier ordførar Torgeir Dahl (H).

Seier nei og viser til Hovudavtalen

Men Utdanningsforbundet i Molde seier nei til den uvanlege dispensasjonssøknaden.

Fredag ettermiddag konkluderte fagforeininga med at dei ikkje vil gje dispensasjon til alle lærarane på ein enkelt ungdomsskule. Dei viser til Hovudavtalen som seier at slike søknader må vere personlege og ikkje kan gjelde alle elevane.

– Vi meiner det er å ta hardt i å seie at 400 elevar har sånne plager som gjer at vi skal innvilge dispensasjon på alle lærarane ved skulen, seier streikeleiar Cecilie Sandvik i Utdanningsforbundet i Molde.

Ho seier ho ikkje tidlegare har opplevd at kommunar har søkt om dispensasjon for heile skular før og at dei ikkje ville risikere at eit ja til Molde skulle føre til at fleire ber om det same.

Frå måndag er over 8000 lærarar over heile landet i streik:

Laurdag opplyser riksmeklar Mats Wilhelm Ruland til NRK at han har hatt kontakt med arbeidstakarsida, men at det ikkje er noko nytt å melde.

Lærarane offentleggjorde laurdag føremiddag forslaget som dei har gitt til motparten.

– Burde starta for lengst

Heime hos familien Hervik Thorbjørnsen i Molde synest mor Gunhild Hervik at konklusjonen til Utdanningsforbundet er feil, og ungane snart burde få kome tilbake til skulen.

– Det hadde gjort ein kjempestor forskjell. Då kunne dei fått konkrete oppgåver å jobbe med og då er det enklare å kome i gang. Når dei då begynner på skulen igjen og streiken er over, hadde dei hatt ein sjanse til å starte godt. No har dei ikkje grunnlag for å gjere noko som helst, og berre ventar, seier Hervik.

Eldsteguten Mario Hervik Thorbjørnsen (15) skulle begynt i 10. klasse i haust. Han seier det har vore tungt både å stå opp og gjere skulearbeid. No håper han streiken snart er over.

– Vi burde vore på skulen. Vi burde starta for lengst, seier han.