Han er ein av dei næraste naboane til Bingsa og er talsmann i velforeininga i Olsvika i Ålesund. Då brannen starta klokka 13.18 i dag, fekk folk beskjed om å late att dører og vindauge og halde seg inne. Røyken som velta ut frå det brennande søppelberget var giftig. Barnehageungane i området fekk ikkje vere ute og leike seg.
– Det er lov å dumpe alt mogleg, så vi er uroleg for kva gassane kan innehalde, seier Alvik.
Han kjenner til fleire som rømmer husa sine fordi dei ikkje tør å vere heime.
LES OGSÅ:
Kritisk til hall også
Det var ein søppelhaug på 500–600 tonn med industriavfall som tok fyr. Søppelet skulle fraktast til Tafjord kraftvarme og brennast der. Før tok Tafjord kraftvarme imot slikt industriavfall direkte, men fekk problem med at det ikkje var godt nok sortert og omnane vart øydelagt. Difor vert alt avfallet no mellomlagra på Bingsa og sortert utandørs.
Etter reglane skal sortering av avfallet skje under tak, og planen er å sette opp ein hall i løpet av året. Alvik meiner at ein hall ikkje vil gjere situasjonen betre.
– Det blir ikkje noko betre av å ha søppelet inne i ein hall. Problemet er det same, seier Alvik.
Vil ha betre varsling
Rundt påsketider sende velforeininga ein rapport til kommunelegen i Ålesund, der dei stilte ein del spørsmål rundt søppelanlegget. Blant anna etterlyser dei varslingsrutinar ved brann.
– I dag ser vi at mange hus stod med opne vindauge, fordi varslingsrutinane ikkje er på plass. Kommunen burde ha sendt ein sms, seier Alvik.
Alvik har lenge frykta at ein slik brann som i dag kom til å skje.
– Eg er redd for at det kjem til å skje fleire gongar framover, seier Alvik.
Lenge sidan sist
Brannvesenet stadfestar at det har vore fleire brannutrykkingar, men dette gjeld automatisk brannvarsling som vert utløyst av støv, damp og f.eks. eksos. Det er svært lenge sidan sist det var brann ved anlegget.
Teamleiar Per Oskar Slinning i Ålesund kommune seier at naboane ikkje skal vere uroa for fleire brannar.
– Avfallsanlegg er underlagt eit strengt regelverk som vi fylgjer. Ut ifrå våre risikovurderingar skal det ikkje vere farleg å bu i nærleiken av deponiet, seier Slinning.
Han seier at brann er noko som skjer både i private heimar og i industribedrifter.
Har fått sms
– Fekk naboane god nok varsling slik som Alvik etterlyser?
– I samråd med politiet sende vi i kveld ut ei varsling på sms om at det er mykje røyk på grunn av ettersløkking og at vi anbefaler folk å late att vindauga, seier Slinning.
– Burde den varslinga ha kome før?
– Dette vart gjort i samråd med innsatsleiar i politiet, svarer Slinning. Det er venta at det vil ta fleire dagar før brannen vert sløkt.