– Dette kunne ikkje ha blitt betre

Sommarbåten MS «Sjøkurs» har klappa til kai i Ålesund, og blei møtt av eit folkehav. Sola skin frå skyfri himmel, Aalesund fotballklubb har heimekamp, Sommeråpent skal gå på NRK1 i kveld og det er eit yrande båtliv på hamna.

• Følg MS Sjøkurs direkte

Det var Jan Arild Hagen som fekk æra av å ta imot trossa frå MS «Sjøkurs». Tidlegare heitte denne båten Ragnvald Jarl. Den 25. juni 1957 reiste Jan Arild Hagen med denne hurtigruta for første gong. Han skulle til tannlegespesialist i Bergen.

– Det var slik ei koseleg reise, og eg møtte mange trivelege folk der. Sidan har eg følgt med på hurtigrutene kvar einaste dag, fortel Jan Arild Hagen.

• Les også: Sommarbåten er no i Ålesund

Det var store klappsalvar då Jan Arild Hagen tok imot trossa. Og alle gledde seg over at Møre og Romsdal fekk vise seg fram frå ei slik vakker side på denne dagen.

– Dette er heilt fantastisk. Det kunne ikkje ha vore betre, sa Heidi Torben då skipet klappa til kai. Ho og Elisabeth Krogen Valderhaug kombinerte førebuingane til fotballkampen Aalesund - Sogndal med ein tur på Skansekaia.

• Les også: I skipets indre

No var ikkje Jan Arild Hagen heilt nøgd med manøvreringa til den tidlegare hurtigruta denne dagen. Det var heilt greitt at skipet la til på sydsida av Skansekaia, og ikkje på nordsida, slik hurtigrutene bruka å gjere.

– Ho skulle ha bakka inn her. Dette er alt for trongt, når ho skal ha baugen peikande ut gjennom Moljegapet, sa Jan Arild Hagen, mens han venta på trossa. Men han slo seg til ro då redningsskøyta hjelpte til med å gje hurtigruta ein dytt på hekken, slik at vendinga skjedde trygt inne på den tronge hamna.

• Les også: Her skaper fluen problemer
• Les også: Ville helst stå ute heile turen

Med eit smil måtte han legge til ein ting til. MS «Sjøkurs» tok nemleg ei ekstrarunde inn Heissafjorden og heilt inn på slinningen. Skipet hadde god tid, og det norske folk fekk sjå innseglinga til Ålesund også frå sydsida.

– Nei, dette var vekkasta tid og olje, lo Hagen.

På kaia har det møtt fram fleire hundre tilskodarar. Og det er stor stemning på kaia. Ålesund sentrumsforeining har lagt opp til eit underhaldningsprogram på kaia. Seinare i dag blir det underhaldning frå båtdekk, når Sommeråpent tek til. Sendinga frå Sommeråpent tek til klokka 21.30. Før den tid blir det sendt eit program frå reisa frå Kalvåg i Sogn og Fjordane til Ålesund.